സ്മിത്തും വാര്‍ണറും ലോകോത്തര താരങ്ങള്‍

സ്റ്റീവന്‍ സ്മിത്തും ഡേവിഡ് വാര്‍ണറും ലോകോത്തര താരങ്ങളുെന്നും ഇരുവരും തിരികെ ടീമിലെത്തിയത് നല്ല വാര്‍ത്തയാണെന്നും പറഞ്ഞ് ഓസ്ട്രേലിയന്‍ സെലക്ടര്‍മാരുടെ ചെയര്‍മാനായ ട്രെവര്‍ ഹോണ്‍സ്. ഇരുവരും ഐപിഎലില്‍ ഫോം കണ്ടെത്താനായി എന്നത് ടീമിനു ഗുണകരമാകുമെന്നും ട്രെവര്‍ പറഞ്ഞു. എന്നാല്‍ വാര്‍ണറുടെ കാര്യത്തില്‍ ഫോം സത്യമാണെങ്കിലും സ്മിത്ത് ഇതുവരെ തന്റെ പഴയ ഫോം കണ്ടെത്താനാകാതെ ഐപിഎലില്‍ ബുദ്ധിമുട്ടുകയാണ്. രാജസ്ഥാന്‍ റോയല്‍സ് ടീമിലെ ഏറ്റവും മോശം ഫോമിലുള്ള താരവും പന്ത് നേരെ സ്ട്രൈക്ക് പോലും ചെയ്യുവാന്‍ പലപ്പോഴും സ്മിത്ത് ബുദ്ധിമുട്ടുന്നതുമാണ് കാണുവാനായത്.

പീറ്റര്‍ ഹാന്‍ഡ്സ്കോമ്പ് മികച്ച ഫോമിലാണെങ്കിലും ദൗര്‍ഭാഗ്യകരമായി ടീമിലിടം ലഭിയ്ക്കാതെ പോകുകയായിരുന്നുവെന്നും ഹോണ്‍സ് പറഞ്ഞു. സെലക്ടര്‍മാര്‍ക്ക് ഓസ്ട്രേലിയന്‍ ടീമിലെ വൈവിധ്യം കാരണം ടീം സെലക്ഷന്‍ ഏറെ ശ്രമകരമായ ദൗത്യമായിരുന്നുവെന്നും ഹോണ്‍സ് പറഞ്ഞു. പരിക്കേറ്റ് ഏറെ കാലമായി കളിക്കാത്തതിനാലാണ് ഹാസല്‍വുഡിനെ ലോകകപ്പിലേക്ക് പരിഗണിക്കാത്തതെന്നും മുഖ്യ സെലക്ടര്‍ പറഞ്ഞു.

ആഷസിന്റെ സമയത്ത് ജോഷ് ഹാസല്‍വുഡിനെ തിരികെ എത്തിക്കുവാന്‍ തയ്യാറാക്കുകയാണ് തങ്ങളുടെ ലക്ഷ്യമെന്ന് പറഞ്ഞ ട്രെവര്‍ താത്തെ ഓസ്ട്രേലിയ എ ടീമില്‍ ഉള്‍പ്പെടുത്തിയിട്ടുണ്ടെന്നും അറിയിച്ചു. ഇംഗ്ലണ്ട് പരമ്പരയിലേക്കുള്ള ഓസ്ട്രേലിയ എ ടീമിലേക്ക് ഹാന്‍ഡ്സ്കോമ്പ്, ആഷ്ടണ്‍ ടര്‍ണര്‍, കെയിന്‍ റിച്ചാര്‍ഡ്സണ്‍ എന്നിവരെയും ഉള്‍പ്പെടുത്തിയിട്ടുണ്ട്.