ഐ.സി.സി ലോക ചാമ്പ്യൻഷിപ്പിന്റെ ഭാഗമായി ബംഗ്ളദേശിനെ പിങ്ക് ബോൾ ടെസ്റ്റിന് ക്ഷണിച്ച് പാകിസ്ഥാൻ. നേരത്തെ തന്നെ ജനുവരിയിൽ പാകിസ്ഥാനിൽ വെച്ച് രണ്ട് ടെസ്റ്റ് മത്സരങ്ങളുള്ള ടെസ്റ്റ് പരമ്പര കളിക്കാൻ ബംഗ്ളദേശ് തീരുമാനിച്ചിരുന്നു. ഇതിലെ ഒരു മത്സരം ഡേ നൈറ്റ് മത്സരമായി കളിക്കാനാണ് പാകിസ്ഥാൻ ക്രിക്കറ്റ് ബോർഡിന്റെ ശ്രമം.
പരമ്പര നടത്തുന്നതിന് വേണ്ടി പാകിസ്ഥാൻ ക്രിക്കറ്റ് ബോർഡ് ബംഗ്ളദേശ് ക്രിക്കറ്റ് ബോർഡിനെ സമീപിച്ചിട്ടുണ്ടെന്ന് പാകിസ്ഥാൻ ക്രിക്കറ്റ് ബോർഡ് സി.ഇ.ഓ വാസിം ഖാൻ പറഞ്ഞു. ഡേ നൈറ്റ് ടെസ്റ്റ് കളിക്കുന്നതിന് വേണ്ടി ബംഗ്ളദേശ് തങ്ങളുടെ ഗവണ്മെന്റിന്റെ സമ്മതത്തിനായി കാത്തിരിക്കുകയാണ്. ഒരു ആഴ്ചക്കുള്ളിൽ ഇതിൽ ഒരു തീരുമാനം ഉണ്ടാവുമെന്നാണ് ബംഗ്ലാദേശ് ക്രിക്കറ്റ് ബോർഡ് അറിയിച്ചത്.
പാകിസ്ഥാൻ ഇതുവരെ ഡേ നൈറ്റ് ടെസ്റ്റ് മത്സരം കളിച്ചിട്ടില്ല. അതെ സമയം കഴിഞ്ഞ മാസം ഇന്ത്യക്കെതിരെയുള്ള പരമ്പരയിൽ ബംഗ്ലാദേശ് കൊൽക്കത്തയിൽ വെച്ച് ഡേ നൈറ്റ് ടെസ്റ്റ് മത്സരം കളിച്ചിരുന്നു.
