21 വയസ്സില്‍ തീ തുപ്പുന്ന പന്തുകളാണ് ഒഷെയ്ന് തോമസ് എറിയുന്നത്. ഏകദിനത്തിലും ഇതേ പേസില്‍ എറിഞ്ഞ തോമസ് ടി20 അരങ്ങേറ്റത്തില്‍ കൂടുതല്‍ അപകടകാരിയായി തോന്നിപ്പിച്ചു. കൊല്‍ക്കത്തയില്‍ വിന്‍ഡീസ് ബാറ്റിംഗ് നിര തകര്‍ന്നുവെങ്കിലും ഇന്ത്യയെ പ്രതിരോധത്തിലാക്കുവാന്‍ തോമസിനും കാര്‍ലോസ് ബ്രാത്‍വൈറ്റിനും അടങ്ങിയ വിന്‍ഡീസ് ബൗളിംഗ് നിരയ്ക്കായി.
തനിക്ക് ലഭിയ്ക്കുന്ന അവസരങ്ങളുടെ മൂല്യം ഒഷെയ്ന് തോമസിനു അറിയാമെന്നും താരം ഇതുപോലെ തന്നെ ശക്തമായി മുന്നോട്ട് പോകുകയാണെങ്കില്‍ വിന്‍ഡീസ് ക്രിക്കറ്റിനു താരത്തിനെ മറ്റൊരു ജോയല്‍ ഗാര്‍ണറോ മൈക്കിള്‍ ഹോള്‍ഡിംഗോ ആക്കി വളര്‍ത്തിയെടുക്കാനാകുമെന്നാണ് വിന്‍ഡീസ് ടി20 നായകന്‍ കാര്‍ലോസ് ബ്രാത്‍വൈറ്റ് ഒഷെയ്ന് തോമസിനെക്കുറിച്ച് അഭിപ്രായപ്പെട്ടത്.
താരത്തിന്റെ വര്‍ക്ക് ലോഡ് കൈകാര്യം ചെയ്യുന്നതാണ് ഏറെ പ്രാധാന്യമെന്ന തിരിച്ചറിവു വിന്‍ഡീസ് ബോര്‍ഡിനും ടീം മാനേജ്മെന്റിനും ഉണ്ടായാല്‍ ഭാവിയിലെ ഏറ്റവും അപകടകാരിയായി മാറിയേക്കാവുന്ന വിന്‍ഡീസിന്റെ പഴയ പ്രതാപകാല പേസ് ബൗളിംഗിനെ ഓര്‍മ്മിപ്പിക്കുന്ന ഒരു താരമായി ക്രിക്കറ്റ് ലോകത്തെ ആരാധകരെ ത്രസിപ്പിക്കുവാന്‍ ഒഷെയ്ന് തോമസിനു ആവുമെന്നാണ് വിലയിരുത്തപ്പെടുന്നത്.
