വെസ്റ്റിൻഡീസിനെതിരായ ഏകദിന പരമ്പരക്കുള്ള ടീമിൽ നിന്ന് പരിക്ക് മൂലം പുറത്തുപോയ ശിഖർ ധവാന് പകരം മായങ്ക് അഗർവാൾ കളിക്കുമെന്ന് റിപ്പോർട്ടുകൾ. ഇതോടെ ടി20 പരമ്പരയിൽ ശിഖർ ധവാന് പകരക്കാരനായി അവസരം ലഭിച്ച മലയാളി താരം സഞ്ജു സാംസണ് ഇതോടെ ഏകദിന ടീമിൽ അവസരം ലഭിക്കാനുള്ള സാധ്യത കുറഞ്ഞു. വെസ്റ്റിൻഡീസിനെതിരെ ഇതുവരെ നടന്ന രണ്ട് ടി20 മത്സരങ്ങളിലും സഞ്ജു സാംസണ് അവസരം ലഭിച്ചിരുന്നില്ല.
ടെസ്റ്റ് ക്രിക്കറ്റിൽ ഇന്ത്യയുടെ ഓപണർ എന്ന നിലയിൽ പുറത്തെടുത്ത മികച്ച പ്രകടനമാണ് മായങ്ക് അഗർവാളിന് ഏകദിനത്തിൽ അവസരം ലഭിക്കാൻ കാരണം. സയ്ദ് മുഷ്‌താഖ്‌ അലി ട്രോഫിയിൽ മഹാരാഷ്ട്രക്കെതിരെ കളിക്കുമ്പോഴാണ് ശിഖർ ധവാന്റെ കാൽ മുട്ടിന് പരിക്കേറ്റത്. താരത്തിന്റെ പരിക്ക് പെട്ടെന്ന് മാറുമെന്ന് കരുതിയെങ്കിലും ഏകദിന പരമ്പരക്ക് താരം ഉണ്ടാവില്ലെന്ന് അറിയിക്കുകയായിരുന്നു. ഡിസംബർ 15ന് തുടങ്ങുന്ന ഏകദിന പരമ്പരയിൽ മൂന്ന് ഏകദിന മത്സരങ്ങളാണ് ഇന്ത്യ വെസ്റ്റിൻഡീസിനെതിരെ കളിക്കുന്നത്.
