ദക്ഷിണാഫ്രിക്ക ക്രിക്കറ്റ് ടീമിന്റെ പരിശീലക സ്ഥാനം മാർക്ക് ബൗച്ചർ ഒഴിയും. അടുത്ത മാസം ഓസ്‌ട്രേലിയയിൽ നടക്കുന്ന ഐസിസി പുരുഷ ടി20 ലോകകപ്പിന് ശേഷം ആകും അദ്ദേഹം സ്ഥാനമൊഴിയുക എന്ന് ക്രിക്കറ്റ് സൗത്ത് ആഫ്രിക്ക അറിയിച്ചു.
2019 ഡിസംബർ മുതൽ ബൗച്ചർ ദക്ഷിണാഫ്രിക്ക ടീമിന്റെ പരിശീലക വേഷം അണിയുന്നുണ്ട്. ഇന്ത്യയ്‌ക്കെതിരായ പരമ്പര വിജയം ഉൾപ്പെടെ 11 ടെസ്റ്റ് വിജയങ്ങളിലേക്ക് ദക്ഷിണാഫ്രിക്കയെ നയിക്കാൻ ബൗച്ചറിനായിരുന്നു. ബൗച്ചർ പരിശീലകനായിരിക്കെ ദക്ഷിണാഫ്രിക്ക 12 ഏകദിന വിജയങ്ങളും 23 ടി20 വിജയങ്ങളും സ്വന്തമാക്കി.
