കാലിസ് ഐസിസി ഹാള്‍ ഓഫ് ഫെയിമില്‍, സഹീര്‍ അബ്ബാസിനും ലിസ സ്തലേക്കറിനും ബഹുമതി

- Advertisement -

ഐസിസിയുടെ ഈ വര്‍ഷത്തെ ഹാള്‍ ഓഫ് ഫെയിമിലേക്ക് മൂന്ന് താരങ്ങള്‍. ദക്ഷിണാഫ്രിക്കയുടെ ജാക്വസ് കാലിസ്, പാക്കിസ്ഥാന്റെ സഹീര്‍ അബ്ബാസ് എന്നിവര്‍ക്കൊപ്പം ഓസ്ട്രേലിയയുടെ വനിത താരം ലിസ സ്തലേക്കറിനും ബഹുമതി ലഭിച്ചു. ഇന്ന് ഐസിസിയുടെ പോര്‍ട്ടലില്‍ ഓണ്‍ലൈന്‍ വഴിയാണ് ഇത്തവണ ഐസിസി ഹാള്‍ ഓഫ് ഫെയിമിലേക്ക് ഇവരെ ഉള്‍പ്പെടുത്തിയത്.

ടെസ്റ്റിലും ഏകദിനത്തിലും 10000 റണ്‍സും 200 വിക്കറ്റും നേടിയിട്ടുള്ള ഏക താരമാണ് ജാക്വസ് കാലിസ്. 250000ത്തിലധികം അന്താരാഷ്ട്ര റണ്‍സും 600നടുത്ത് വിക്കറ്റുംനേടിയ താരം വിക്കറ്റ് കീപ്പറല്ലാത്ത താരങ്ങളില്‍ 200ലധികം ക്യാച്ചുകള്‍ പൂര്‍ത്തിയാക്കിയ മൂന്ന് താരങ്ങളില്‍ ഒരാളാണ് കാലിസ്.

ഓസ്ട്രേലിയയ്ക്ക് വേണ്ടി ഏകദിന, ടി20 ലോകകപ്പ് രണ്ട് തവണ നേടിയിട്ടുള്ള താരമാണ് ലിസ സ്തലേക്കര്‍. ഏകദിനത്തില്‍ 2005, 2013 ലോകകപ്പും ടി20 ലോകകപ്പ് 2010, 2012 ലും നേടിയ താരം ഏകദിനത്തില്‍ ആയിരം റണ്‍സും നൂറ് വിക്കറ്റും നേടിയ ആദ്യ താരമാണ് ലിസ.

റണ്‍സ് നേടുവാനുള്ള ശേഷി കാരണം ഏഷ്യന്‍ ബ്രാഡ്മാന്‍ എന്ന ഓമനപ്പേരില്‍ അറിഞ്ഞിരുന്ന താരമാണ് സഹീര്‍ അബ്ബാസ്. വിലയ സ്കോറുകള്‍ നേടുവാന്‍ കഴിവുള്ള താരം ടെസ്റ്റില്‍ 5062 റണ്‍സാണ് നേടിയിട്ടുള്ളത്. 12 ടെസ്റ്റ് ശതകങ്ങള്‍ നേടിയ താരം ഇന്ത്യയ്ക്കെതിരെയാണ് ഇതില്‍ 6 ശതകം നേടിയത്.

Advertisement