വിജയക്കുതിപ്പ് തുടരാൻ സൺറൈസേഴ്സ്, പൊരുതി ജയിക്കാൻ മുംബൈ ഇന്ത്യൻസ്

- Advertisement -

ഇന്ത്യൻ പ്രീമിയർ ലീഗിലെ സൂപ്പർ പോരാട്ടത്തിൽ മുംബൈ ഇന്ത്യൻസ് സൺ റൈസേഴ്സ് ഹൈദരാബാദിനെ നേരിടും. ഹൈദരാബാദിലെ രാജീവ് ഗാന്ധി സ്റ്റേഡിയത്തിൽ വെച്ചാണ് മത്സരം നടക്കുക. ഐപിഎല്ലിലെ ബാറ്റ്സ്മാൻമാരുടെ പറുദീസയായി അറിയപ്പെടുന്ന സ്റ്റേഡിയത്തിൽ ഇരു ടീമുകളും ഇറങ്ങുമ്പോൾ തീ പാറുന്നൊരു മത്സരം തന്നെ ഇന്ത്യൻ ക്രിക്കറ്റ് ആരാധകർക്ക് പ്രതീക്ഷിക്കാം. ഈ സീസണിൽ തകർപ്പൻ ഫോമിലാണ് സൺ റൈസേഴ്സ്.

തുടർച്ചയായ മൂന്ന് ഐപിഎൽ മത്സരങ്ങൾ ജയിച്ച ഹൈദരാബാദാണ് ഇപ്പോൾ പോയന്റ് നിലയിൽ ഒന്നാമത്. ഡേവിഡ് വർണറുടെയും ജോണി ബൈറസ്റ്റോവിന്റെയും ചുമലിലേറി കുതിക്കുകയാണ് ഹൈദരാബാദ്. അവസാന മത്സരത്തിൽ ഒൻപത് പന്തുകൾ ബാക്കി നിൽക്കെ ഡൽഹി ക്യാപിറ്റൽസിനോട് അഞ്ചു വിക്കറ്റ് ജയമാണ് ഹൈദരാബാദ് സ്വന്തമാക്കിയത്. അതെ സമയം ഈ സീസണിൽ കൺസിസ്റ്റൻസി ഇല്ലാത്ത മുംബൈ ഇന്ത്യൻസ് രണ്ടു മത്സരം ജയിക്കുകയും രണ്ടു മത്സരത്തിൽ പരാജയപ്പെടുകയും ചെയ്തു.

നിലവിൽ പോയന്റ് നിലയിൽ ആറാമതാണ് രോഹിത് ശർമ്മയുടെ മുംബൈ ഇന്ത്യൻസ്. എന്നാൽ ഹാര്ദിക്ക് പാണ്ട്യയുടെ ഓൾ റൌണ്ട് പ്രകടനത്തിന്റെ പിൻബലത്തിൽ നിലവിലെ ചാമ്പ്യന്മാരായ ചെന്നൈ സൂപ്പർ കിങ്സിനെ പരാജയപ്പെടുത്തിയിരുന്നു മുംബൈ ഇന്ത്യൻസ്. ഐപിഎല്ലിൽ ഇരു ടീമുകളുടെയും പോരാട്ടത്തിന്റെ ചരിത്രമെടുത്താൽ 12 തവണയാണ് ഇരു ടീമുകളും ഏറ്റുമുട്ടിയത്. അതിൽ ഏഴു തവണയും ജയം സ്വന്തമാക്കിയത് സൺ റൈസേഴ്സ് ഹൈദരാബാദാണ്. അഞ്ചു തവണ മാത്രമേ മുംബൈ ഇന്ത്യൻസിന് ജയിക്കാൻ സാധിച്ചിരുന്നുള്ളു. ഇന്ന് വൈകിട്ട് 8 മണിക്കാണ് മത്സരം ആരംഭിക്കുക.

Advertisement