പരിശീലനത്തിനിടെ പരിക്കേറ്റതിനെത്തുടര്‍ന്ന് മുംബൈ നായകന്‍ രോഹിത് ശര്‍മ്മയെ വിശ്രമിപ്പിക്കുവാന്‍ മുംബൈ ഇന്ത്യന്‍സ് തീരുമാനിച്ചപ്പോള്‍ 2011നു ശേഷം ഇതാദ്യമായി മുംബൈയ്ക്കായി ഒരു മത്സരത്തിനിറങ്ങാതെ രോഹിത് ശര്‍മ്മ. 2011നു ശേഷം ഇന്നിതുവരെ മുംബൈ ഇന്ത്യന്‍സിന്റെ എല്ലാ മത്സരങ്ങളിലും രോഹിത് ശര്‍മ്മ കളിച്ചിരുന്നു. തുടര്‍ച്ചയായ 133 മത്സരങ്ങളാണ് മുംബൈയ്ക്കായി 2011ല്‍ അരങ്ങേറ്റം നടത്തിയ ശേഷം രോഹിത് ഇന്ന് വരെ കളിച്ചത്. സന്നാഹ മത്സരത്തിലെ പരിക്ക് അത്ര ഗുരുതരമല്ലെന്ന് പകരം നായകന്‍ കീറണ്‍ പൊള്ളാര്‍ഡ് പറഞ്ഞുവെങ്കിലും 4-6 ആഴ്ച വരെ താരത്തിനു വിശ്രമം ആവശ്യമാകുമെന്നാണ് ദേശീയ മാധ്യമങ്ങളിലും സമൂഹ മാധ്യമങ്ങളിലും വരുന്ന വാര്‍ത്ത.
എന്നാല്‍ ഇത് എത്രമാത്രം സത്യമാണെന്നതില്‍ ഔദ്യോഗിക സ്ഥിതീകരണം മുംബൈ ഇന്ത്യന്‍സ് പുറത്ത് വിട്ടിട്ടില്ല. ടോസ് സമയത്ത് രോഹിത്തിന്റെ പരിക്ക് അത്ര ഗുരുതരമല്ലെന്നും കരുതലെന്ന നിലയിലാണ് വിശ്രമമെന്നുമാണ് കീറണ്‍ പൊള്ളാര്‍ഡ് അഭിപ്രായപ്പെട്ടത്.
