വിചാരിച്ച പോലെ കാര്യങ്ങളൊന്നും നടക്കാത്ത ദിനമെന്നാണ് ഇന്നലത്തെ തോല്‍വിയെക്കുറിച്ച് മത്സര ശേഷം സ്റ്റീവ് സ്മിത്ത് പറഞ്ഞത്. ദുബായിയിലെ വലിയ ഗ്രൗണ്ടില്‍ ആദ്യം ബാറ്റ് ചെയ്യുന്ന ടീം ജയിക്കുന്നത് പതിവായപ്പോള്‍ ടോസ് നേടിയിട്ടും കൊല്‍ക്കത്തയ്ക്കെതിരെ ഫീല്‍ഡിംഗാണ് സ്റ്റീവ് സ്മിത്ത് തിരഞ്ഞെടുത്തത്.
അതിന് കാരണമായി സ്മിത്ത് പറയുന്നത് കൊല്‍ക്കത്ത ചേസ് ചെയ്യുവാന്‍ ഇഷ്ടപ്പെടുന്ന ടീമാണെന്നും അതിനാല്‍ തന്നെ അവരുടെ ഡെത്ത് ബൗളിംഗിനെ സമ്മര്‍ദ്ദത്തിലാക്കുവാനുള്ള തീരുമാനം ആയിരുന്നു രാജസ്ഥാന്റെയെന്നുമാണ്. എന്നാല്‍ തുടക്കം തന്നെ വിക്കറ്റുകള്‍ വീണപ്പോള്‍ ഇത്തരത്തിലൊരും സമ്മര്‍ദ്ദം സൃഷ്ടിച്ചെടുക്കുവാന്‍ തന്റെ ടീമിന് സാധിച്ചില്ലെന്നും രാജസ്ഥാന്‍ നായകന്‍ വ്യക്തമാക്കി.
ഏതാനും ക്യാച്ചുകള്‍ തന്റെ ടീം കൈവിട്ടതും കാര്യങ്ങള്‍ കൂടുതല്‍ വഷളാക്കിയെന്ന് സ്മിത്ത് പറഞ്ഞു. ഇന്നത്തെ തോല്‍വി നിരാശയുളവാക്കുന്നതാണെങ്കിലും മുന്നോട്ടുള്ള മത്സരങ്ങള്‍ക്ക് സാഹചര്യം അനുസരിച്ച് ഏറ്റവും മികച്ച ടീം കോമ്പിനേഷന്‍ സൃഷ്ടിക്കുകയാണ് പ്രധാനമെന്നും സ്മിത്ത് വ്യക്തമാക്കി.
