എംഎസ് ധോണി അടുത്ത വര്‍ഷവും ഐപിഎലില്‍ ചെന്നൈയ്ക്കൊപ്പമുണ്ടാകുമെന്നാണ് ചെന്നൈയുടെ സിഇഒ പറയുന്നതെങ്കിലും അടുത്ത സീസണില്‍ ടീം രവീന്ദ്ര ജഡേജയെ കേന്ദ്രീകരിച്ചാവണം തങ്ങളുടെ സ്ക്വാഡ് പടുത്തുയര്‍ത്തേണ്ടതെന്ന് പറഞ്ഞ് മുന്‍ ഇംഗ്ലണ്ട് നായകന്‍ മൈക്കല്‍ വോണ്‍.
ഐപിഎലില്‍ നിന്ന് ഈ സീസണിന് ശേഷം ധോണി വിരമിക്കുകയാണെങ്കില്‍ ചെന്നൈ സൂപ്പര്‍ കിംഗ്സ് ജഡേജയെ ക്യാപ്റ്റനാക്കി ടീമിനെ പടുത്തുയര്‍ത്തണമെന്നാണ് വോണ്‍ ആവശ്യപ്പെടുന്നത്. അടുത്ത രണ്ട് വര്‍ഷം കൂടി ധോണി ചെന്നൈയ്ക്ക് വേണ്ടി കളിച്ചേക്കാം എന്നാല്‍ അതിലപ്പുറം താരത്തിന് കളിക്കാനാകില്ല. അപ്പോള്‍ അടുത്ത സീസണ്‍ മുതല്‍ ജഡേജയെ കേന്ദ്രീകരിച്ചുള്ള ടീം സൃഷ്ടിക്കുവാന്‍ ചെന്നൈ നടപടികള്‍ ആരംഭിക്കണമെന്ന് വോണ്‍ വ്യക്തമാക്കി.
ബാറ്റിംഗും ബൗളിംഗും ഫീല്‍ഡിംഗുമായാലും ടീമിന് വേണ്ടി നൂറ് ശതമാനം ആത്മാര്‍ത്ഥതയോടെ കളത്തിലിറങ്ങുന്ന താരമാണ് ജഡേജയെന്നും താരത്തിന്റെ മൈന്‍ഡ്സെറ്റും മെന്റാലിറ്റിയും മികച്ചതാണെന്നും വോണ്‍ സൂചിപ്പിച്ചു.
