ഇന്ത്യൻ ടീം ക്യാപ്റ്റൻ വിരാട് കോഹ്ലിയെയും ഓപ്പണർ രോഹിത് ശർമ്മയെയും അമിതമായി ആശ്രയിക്കുന്നുണ്ടെന്ന് മുൻ ഇന്ത്യൻ സ്പിന്നർ ഹർഭജൻ സിംഗ്. നിലവിൽ ഇന്ത്യൻ ടീമിൽ മാച്ച് വിന്നേഴ്സ് കുറവാണെന്നും മുൻ ഇന്ത്യൻ താരം പറഞ്ഞു. ഇന്ത്യൻ ഓപ്പണർ രോഹിത് ശർമ്മയുമായുള്ള ലൈവ് ചാറ്റിനിടെയാണ് ഹർഭജൻ സിംഗ് ഈ അഭിപ്രായവുമായി രംഗത്തെത്തിയത്.
ഇന്ത്യൻ ടീമിൽ എത്തുന്ന യുവതാരങ്ങൾ ടീമിൽ സ്ഥാനം നഷ്ട്ടപെടുന്നതിനെ കുറിച്ചാണ് കൂടുതൽ ചിന്തിക്കുന്നതെന്നും അത് കൊണ്ട് അവർക്ക് മികച്ച പ്രകടനം പുറത്തെടുക്കാനാവില്ലെന്നും ഹർഭജൻ സിംഗ് പറഞ്ഞു. വിരാട് കോഹ്‌ലിയും രോഹിത് ശർമ്മയും കഴിഞ്ഞാൽ ഇന്ത്യൻ ടീമിൽ മികച്ച പ്രകടനം പുറത്തെടുക്കുന്നത് കർണാടക താരം കെ.എൽ രാഹുൽ ആണെന്നും താരത്തിന്റെ 5-6 സ്ഥാനങ്ങളിലോ അല്ലെങ്കിൽ ടോപ് ഓർഡറിലോ മികച്ച പ്രകടനം പുറത്തെടുക്കാൻ കഴിയുമെന്നും ഹർഭജൻ സിംഗ് പറഞ്ഞു.
