ശുഭ്മന്‍ ഗില്ലിനെ നഷ്ടമായ ശേഷം മയാംഗ് അഗര്‍വാളും ഹനുമ വിഹാരിയും തങ്ങളുടെ അര്‍ദ്ധ ശതകം പൂര്‍ത്തിയാക്കിയപ്പോള്‍ ഇന്ത്യയ്ക്ക് ഓസ്ട്രേലിയ എയ്ക്കെതിരെ കൂറ്റന്‍ സ്കോര്‍. രണ്ടാം ദിവസം കളി മഴ തടസ്സപ്പെടുത്തിയപ്പോള്‍ ഇന്ത്യ 294/4 എന്ന നിലയിലാണ്. ടീമിന് ഇപ്പോള്‍ 335 റണ്‍സ് ലീഡാണ് കൈവശമുള്ളത്.
111/2 എന്ന നിലയില്‍ രണ്ടാം സെഷന്‍ പുനരാരംഭിച്ച ഇന്ത്യയ്ക്ക് 61 റണ്‍സ് നേടിയ മയാംഗ് അഗര്‍വാളിനെയാണ് നഷ്ടമായത്. ഹനുമ വിഹാരിയുമായി ചേര്‍ന്ന് 53 റണ്‍സാണ് താരം മൂന്നാം വിക്കറ്റില്‍ നേടിയത്. പിന്നീട് ഹനുമ വിഹാരി- അജിങ്ക്യ രഹാനെ കൂട്ടുകെട്ട് നാലാം വിക്കറ്റില്‍ 78 റണ്‍സ് കൂടി നേടി ഇന്ത്യയെ മുന്നോട്ട് നയിച്ചു.
38 റണ്‍സ് നേടിയ രഹാനെയുടെ വിക്കറ്റാണ് ഇന്ത്യയ്ക്ക് നഷ്ടമായത്. 63 റണ്‍സുമായി ഹനുമ വിഹാരിയും 9 റണ്‍സുമായി ഋഷഭ് പന്തുമാണ് ഇന്ത്യയ്ക്കായി ക്രീസിലുള്ളത്.
