ഈ സീസണില്‍ ഇംഗ്ലണ്ടില്‍ നടക്കില്ലെന്ന് ഉറപ്പാക്കിയ ഒരു ടൂര്‍ണ്ണമെന്റാണ് ദി ഹണ്ട്രെഡ്. ടൂര്‍ണ്ണമെന്റിന്റെ ഉദ്ഘാടന സീസണ്‍ ഇപ്പോളത്തെ കൊറോണ മഹാമാരിയുടെ സാഹചര്യത്തില്‍ നടത്തേണ്ടതില്ലെന്ന് തീരുമാനിച്ച ഇംഗ്ലണ്ട് ബോര്‍ഡ് ടൂര്‍ണ്ണമെന്റ് അടുത്ത സീസണിലേക്ക് മാറ്റി. ഈ തീരുമാനം ഏറ്റവും മികച്ചതെന്നാണ് ഇംഗ്ലണ്ടിന്റെ പരിമിത ഓവര്‍ ക്രിക്കറ്റ് നായകന്‍ ഓയിന്‍ മോര്‍ഗന്‍ അഭിപ്രായപ്പെടുന്നത്.
വളരെ കഷ്ടത നിറഞ്ഞ കാലഘട്ടത്തിലൂടെയാണ് നാം കടന്ന് പോകുന്നതെന്നും അതിനാല്‍ തന്നെ ഇത്തരം ഒരു തീരുമാനം ബോര്‍ഡിന്റെ ഭാഗത്ത് നിന്നുള്ള ഏറ്റവും മികച്ച ഒന്നാണെന്നും താരം വ്യക്തമാക്കി. ഈ സാഹചര്യത്തില്‍ പുതിയ ഒരു ടൂര്‍ണ്ണമെന്റിന്റെ തുടക്കം ശരിയായ രീതിയില്‍ നടപ്പിലാക്കാനാകില്ലായിരുന്നു. അത് പരിഗണിക്കുമ്പോള്‍ ഈ തീരുമാനം മികച്ചതാണെന്ന് താരം വ്യക്തമാക്കി.
