ഏറ്റവും പുതിയ ഏകദിന റാങ്കിംഗിലും ഇന്ത്യയെക്കാള്‍ 6 പോയിന്റ് ലീഡ് കൈവരിച്ച് ഇംഗ്ലണ്ട്. നിലവില്‍ റാങ്കിംഗില്‍ ഒന്നാം സ്ഥാനത്തുള്ള ഇംഗ്ലണ്ട് 127 പോയിന്റാണ് നേടിയിട്ടുള്ളത്. രണ്ടാം സ്ഥാനത്തുള്ള ഇന്ത്യ 121 പോയിന്റ് നേടിയിട്ടുണ്ട്. ദക്ഷിണാഫ്രിക്ക 114 പോയിന്റോടെ മൂന്നാം സ്ഥാനത്തേക്കുയര്‍ന്നിട്ടുണ്ട്. ശ്രീലങ്കയ്ക്കെതിരെയുള്ള മികച്ച പരമ്പര വിജയമാണ് ദക്ഷിണാഫ്രിക്കയ്ക്ക് റാങ്കിംഗില്‍ നേട്ടമുണ്ടാക്കിക്കൊടുത്തത്.
അഞ്ച് മത്സരങ്ങളുടെ പരമ്പരയില്‍ ആദ്യ മൂന്ന് മത്സരങ്ങളും ദക്ഷിണാഫ്രിക്ക സ്വന്തമാക്കി കഴിഞ്ഞു. നാലാം സ്ഥാനം ന്യൂസിലാണ്ടിനും അഞ്ചാം സ്ഥാനം പാക്കിസ്ഥാനുമാണ് സ്വന്തമാക്കിയിരിക്കുന്നത്. ന്യൂസിലാണ്ടിനു 112 റേറ്റിംഗ് പോയിന്റും പാക്കിസ്ഥാനു 104 പോയിന്റുമാണുള്ളത്. മോശം ഏകദിന ഫോമിലൂടെ കടന്ന് പോകുന്ന ഓസ്ട്രേലിയ 100 പോയിന്റുമായി ഏഴാം സ്ഥാനത്ത് നില്‍ക്കുന്നു.
കൂടുതൽ കായിക വാർത്തകൾക്ക് : www.facebook.com/FanportOfficial
