ഐസിസി ടൂര്‍ണ്ണമെന്റുകളിലോ ഏഷ്യ കപ്പ് ടൂര്‍ണ്ണമെന്റുകളിലോ മാത്രമായി ചുരുങ്ങിയ ഇന്ത്യ-പാക്കിസ്ഥാന്‍ പരമ്പരകള്‍ പുനരാരംഭിക്കണമെന്ന ആവശ്യവുമായി ഗൗതം ഗംഭീര്‍. ഒന്നുകില്‍ പാക്കിസ്ഥാനുമായി ഇന്ത്യ കളിക്കുന്നതില്‍ പൂര്‍ണ്ണമായും നിരോധനം ഏര്‍പ്പെടുത്തുക അല്ലെങ്കില്‍ ഇരു രാജ്യങ്ങളും തമ്മിലുള്ള പരമ്പരകള്‍ പുനരാരംഭിക്കണമെന്നും മുന്‍ ഇന്ത്യന്‍ ഓപ്പണര്‍ പറഞ്ഞു. ഉപാധികളോടെയുള്ള വിലക്കുകള്‍ ആര്‍ക്കും ഗുണം ചെയ്യുന്നില്ലെന്നാണ് ഗൗതം ഗംഭീറിന്റെ ഭാഷ്യം.
ഏഷ്യ കപ്പിലും ഐസിസി ടൂര്‍ണ്ണമെന്റുകളിലും മാത്രമായി പാക്കിസ്ഥാനെ കളിക്കുന്നതിനു പിന്നില്‍ എന്താണ് ബോര്‍ഡ് ലക്ഷ്യം വയ്ക്കുന്നതെന്നും താരം ചോദിച്ചു. പാക്കിസ്ഥാനുമായി മത്സരങ്ങള്‍ കളിക്കണോ വേണ്ടയോ എന്നതില്‍ ഇന്ത്യ തീരുമാനമെടുക്കണം. വേണ്ടെന്നാണ് തീരൂമാനമെങ്കില്‍ പൂര്‍ണ്ണമായും മത്സരങ്ങള്‍ നിര്‍ത്തുക അഥവാ കളിക്കാമെന്നാണ് തീരൂമാനമെങ്കില്‍ പരമ്പരകളും പുനരാരംഭിക്കണമെന്നും ഗൗതം ഗംഭീര്‍ കൂട്ടിചേര്‍ത്തു.
ഏഷ്യ കപ്പ് കഴിഞ്ഞാല്‍ ഇന്ത്യയും പാക്കിസ്ഥാനും ഇംഗ്ലണ്ടില്‍ നടക്കുന്ന ലോകകപ്പില്‍ ആവും ഏറ്റുമുട്ടുക. 2012-13 കാലഘട്ടത്തിലാണ് ഇരു രാജ്യങ്ങളും തമ്മിലുള്ള അവസാന പരമ്പര നടന്നത്. അന്ന് പാക്കിസ്ഥാന്‍ ഇന്ത്യ സന്ദര്‍ശിക്കുകയായിരുന്നു.
