ഡേവിഡ് വാര്‍ണര്‍ സിഡ്നി ടെസ്റ്റില്‍ പൂര്‍ണ്ണ ഫിറ്റല്ലെങ്കിലും കളിക്കുവാനുള്ള സാധ്യത കൂടുതലാണെന്ന് സൂചന. മോശം ഫോം കാരണം ജോ ബേണ്‍സിനെ ഓസ്ട്രേലിയ ഡ്രോപ് ചെയ്ത കാര്യം കൂടി പരിഗണിക്കുമ്പോള്‍ ഇന്ത്യയ്ക്കെതിരെ ഓപ്പണിംഗിലെ തലവേദന പരിഹരിക്കുവാനുള്ള നീക്കമെന്ന നിലയില്‍ വാര്‍ണറെ 100 ശതമാനം ഫിറ്റല്ലെങ്കിലും കളിപ്പിക്കുമെന്നാണ് ലഭിയ്ക്കുന്ന വിവരം.
താന്‍ നൂറ് ശതമാനം ഫിറ്റ്നെസ്സ് സിഡ്നി ടെസ്റ്റിന് മുമ്പ് കൈവരിക്കില്ലെന്ന് ഓസ്ട്രേലിയന്‍ താരം തന്നെ വ്യക്തമാക്കി. എന്നാല്‍ ഫിറ്റ്നെസ്സ് നൂറ് ശതമാനം അല്ലെങ്കിലും മത്സരത്തില്‍ പങ്കെടുക്കുവാന്‍ വേണ്ട തയ്യാറെടുപ്പുകളെല്ലാം താന്‍ നടത്തുന്നുണ്ടെന്ന് വാര്‍ണര്‍ സൂചിപ്പിച്ചു.
തന്റെ ചുമതലകള്‍ എല്ലാം തനിക്ക് വഹിക്കുവാനാകുമെന്നും ഡേവിഡ് വാര്‍ണര്‍ വ്യക്തമാക്കി. സ്ലിപ്പില്‍ നില്‍ക്കുകയോ ക്യാച്ചുകള്‍ എടുക്കുന്നതിലോ ഒന്നും തനിക്ക് വലിയ ബുദ്ധിമുട്ട് തോന്നുന്നില്ലെന്നും വാര്‍ണര്‍ വ്യക്തമാക്കി. അതേ സമയം വിക്കറ്റുകളഅ‍ക്കിടയിലെ അതിവേഗ ഓട്ടം തനിക്ക് ഇപ്പോളും ബുദ്ധിമുട്ടായേക്കാമെന്നും വാര്‍ണര്‍ തുറന്ന് സമ്മതിച്ചു.
