ഹോബാര്‍ട്ട് ഹറികെയിന്‍സിനെതിരെ മികച്ച വിജയം നേടി അഡിലെയ്ഡ് സ്ട്രൈക്കേഴ്സ്. ആദ്യം ബാറ്റ് ചെയ്ത ഹറികെയിന്‍സിനെ 146 റണ്‍സിന് എറിഞ്ഞിട്ട ശേഷം സ്ട്രൈക്കേഴ്സ് ലക്ഷ്യം 5 വിക്കറ്റ് നഷ്ടത്തില്‍ 18.4 ഓവറില്‍ മറികടക്കുകയായിരുന്നു. പീറ്റര്‍ സിഡില്‍ നേടിയ അഞ്ച് വിക്കറ്റാണ് ഹോബാര്‍ട്ടിന്റെ നടുവൊടിച്ചത്.
താരം തന്റെ 3.3 ഓവറില്‍ 16 റണ്‍സ് വിട്ട് നല്‍കി 5 വിക്കറ്റ് നേടുകയായിരുന്നു. 46 റണ്‍സ് വീതം നേടിയ ബെന്‍ മക്ഡര്‍മട്ടും കോളിന്‍ ഇന്‍ഗ്രാമുമാണ് ഹോബാര്‍ട്ട് നിരയില്‍ തിളങ്ങിയത്. ടിം ഡേവിഡ് 24 റണ്‍സ് നേടി.
അഡിലെയ്ഡിനായി ജാക്ക് വെത്തറാള്‍ഡ് പുറത്താകാതെ 68 റണ്‍സ് നേടിയപ്പോള്‍ ക്യാപ്റ്റന്‍ അലെക്സ് കാറെ നേടിയ 55 റണ്‍സും നിര്‍ണ്ണായകമായി. ആദ്യ ഓവറില്‍ തന്നെ രണ്ട് വിക്കറ്റ് നഷ്ടമായ ശേഷമാണ് അഡിലെയ്ഡ് 107 റണ്‍സ് മൂന്നാം വിക്കറ്റ് കൂട്ടുകെട്ടിന്റെ ബലത്തില്‍ മത്സരത്തില്‍ തിരിച്ചുവരവ് നടത്തിയത്.
