പാക്കിസ്ഥാന്‍ ക്യാപ്റ്റനും ഭാവിയില്‍ ലോക ക്രിക്കറ്റിലെ സൂപ്പര്‍ താരവുമായ ബാബര്‍ അസമിന്റെ ബാറ്റിംഗില്‍ പിഴവുണ്ടെന്ന് പറഞ്ഞ് മുന്‍ പാക്കിസ്ഥാന്‍ താരം ആമീര്‍ സൊഹൈല്‍. 2015ല്‍ അരങ്ങേറ്റം നടത്തിയ അന്ന് മുതല്‍ താരം പാക്കിസ്ഥാന്‍ ബാറ്റിംഗിന്റെ നെടുംതൂണായി മാറിക്കഴിഞ്ഞിട്ടുണ്ട്. താരത്തിന്റെ കവര്‍ ഡ്രൈവ് അത്രയധികം മനോഹരമായ കാഴ്ചയാണെന്നാണ് ഏവരും പറയുന്നത്.
നിലവില്‍ ടി20യില്‍ ഒന്നാം റാങ്കിലുള്ള ബാബര്‍ അസമിന്റെ സ്റ്റാന്‍സ് ഇനിയും മെച്ചപ്പെടാനുണ്ടെന്നാണ് ആമീര്‍ സൊഹൈല്‍ പറയുന്നത്. ഈ സ്റ്റാന്‍സ് കാരണം താരം ബൗള്‍ഡ് ആകുവാനോ എല്‍ബിഡബ്ല്യു ആകുവാനോയുള്ള സാധ്യത കൂടുതലാണെന്നും ആമീര്‍ സൊഹൈല്‍ വ്യക്തമാക്കി. ഇത് മെച്ചപ്പെടുത്തി മികച്ച പൊസിഷനിലേക്ക് താരം എത്തിയാല്‍ പിന്നെ ബൗളര്‍മാര്‍ക്ക് മേല്‍ വ്യക്തമായ ആധിപത്യം താരം പുലര്‍ത്തുമെന്നും മുന്‍ പാക്കിസ്ഥാന്‍ ഓപ്പണര്‍ വ്യക്തമാക്കി.
മിസ്ബ ഉള്‍ ഹക്ക് ഇത് നേരത്തെ തന്നെ കണ്ടെത്തിയിട്ടുണ്ടാകുമെന്നും അമീര്‍ സൊഹൈല്‍ വ്യക്തമാക്കി. അതിന് വേണ്ട മാറ്റങ്ങള്‍ പാക്കിസ്ഥാന്‍ കോച്ച് ശുപാര്‍ശ ചെയ്ത ലോകത്തിലെ ബൗളര്‍മാര്‍ക്ക് പേടി സ്വപ്നമായി അസമിനെ മാറ്റുമെന്നും ആമീര്‍ പ്രത്യാശ പ്രകടിപ്പിച്ചു. ബാബര്‍ അസം സിംഗിളുകളും ഡബിളുകളും നേടി സ്ട്രൈക്ക് ഷഫിള്‍ ചെയ്യുവാനും പഠിക്കണമെന്നും ഇപ്പോള്‍ താരത്തിന്റെ 40 ശതമാനം റണ്‍സും ബൗണ്ടറിയിലൂടെയാണ് പിറക്കുന്നതും ഇതില്‍ മാറ്റം വരുത്തേണ്ടതായിട്ടുണ്ടെന്നും സൊഹൈല്‍ വ്യക്തമാക്കി.
