സിഡ്നിയില്‍ ജനുവരി നാലിനു ആരംഭിക്കുന്ന ആഷസ് പരമ്പരയിലെ അവസാന ടെസ്റ്റില്‍ യുവ സ്പിന്നര്‍ മേസണ്‍ ക്രെയിന്‍ കളിക്കുവാന്‍ സാധ്യതയെന്ന് സൂചന. സിഡ്നിയിലെ സ്പിന്നിനു അനുകൂലമായ പിച്ചില്‍ മേസണ്‍ തന്റെ അരങ്ങേറ്റം കുറിക്കുമെന്നാണ് ഇംഗ്ലണ്ട് കോച്ച് ട്രെവര്‍ ബേലിസ് നല്‍കുന്ന സൂചന. ബോക്സിംഗ് ഡേ ടെസ്റ്റ് സമനിലയായതോടെ 5-0 എന്ന നിലയില്‍ വൈറ്റ് വാഷ് ഇംഗ്ലണ്ട് ഒഴിവാക്കിയിരുന്നു. 20 വയസ്സുകാരന്‍ സ്പിന്നറുള്‍പ്പെടെ ഒന്ന് രണ്ട് മാറ്റങ്ങളോടെയാവും ഇംഗ്ലണ്ട് സിഡ്നിയില്‍ ഇറങ്ങുക എന്നാണ് ടീമിനോട് അടുത്ത വൃത്തങ്ങളില്‍ നിന്ന് ലഭിക്കുന്ന സൂചന.
മോയിന്‍ അലിയുടെ മോശം ഫോമും മേസണ്‍ ക്രെയിനിനു അരങ്ങേറ്റത്തിനുള്ള അവസരം കൂടുതല്‍ ശക്തമാക്കുകയാണ്. മോയിന്‍ അലിയും മേസണ്‍ ക്രെയിനും ഒരുമിച്ച് സിഡ്നിയില്‍ കളിക്കുവാനുമുള്ള സാധ്യതയും തള്ളിക്കളയാനാവില്ല. സിഡ്നി പിച്ച് പരമ്പരാഗതമായി സ്പിന്നര്‍മാരെ പിന്തുണയ്ക്കുന്നു എന്നതും ഒരു ഘടകമാണ്.
കൂടുതൽ കായിക വാർത്തകൾക്ക് : www.facebook.com/FanportOfficial
