Author: jithinvarghese

2019-20 ചാമ്പ്യൻസ് ലീഗിലെ ഗ്രൂപ്പ് സ്റ്റേജിലെ ഡ്രോയിൽ നാല് സ്പാനിഷ് ടീമുകളാണ് ഉൾപ്പെട്ടത്. റയൽ മാഡ്രിഡ്, അത്ലെറ്റിക്കോ മാഡ്രിഡ്, ബാഴ്സലോണ, വലൻസിയ എന്നീ ടീമുകളെ അവരുടെ എതിരാളികളെ അറിഞ്ഞു.

ഗ്രൂപ്പ് എയിലാണ് റയൽ മാഡ്രിഡിന്റെ സ്ഥാനം. പിഎസ്ജി, ബ്രൂഗ്സ്,ഗലറ്റസരായ് എന്നീ ടീമുകളോടൊപ്പമാണ് സിനദിൻ സിദാന്റെ റയലും. അടുത്ത ഘട്ടത്തിലേക്ക് റയലും പിഎസ്ജിയും കടക്കുമെന്നുറപ്പാണ്. കഴിഞ്ഞ 6 ചാമ്പ്യൻസ് ലീഗ് ടൂർണമെന്റുകളിൽ 4 എണ്ണവും നേടിയത് റയൽ മാഡ്രിഡാണ്.

അതേ സമയം ബാഴ്സലോണ ഗ്രൂപ്പ് എഫിലാണ്. ബൊറുസിയ ഡോർട്ട്മുണ്ട്, ഇന്റർ മിലാൻ,സ്ലാബിയ പ്രാഗ് എന്നിവരാണ് ഗ്രൂപ്പ് എഫിലെ ബാഴ്സയുടെ എതിരാളികൾ. 8 ലാ‌ ലീഗ കിരീടങ്ങൾ സമീപകാലത്ത് നേടിയ ബാഴ്സലോണ 2015 നു ശേഷം ചാമ്പ്യൻസ് ലീഗ് കിരീടമുയർത്തിയിട്ടില്ല. ഡിയോഗോ സിമിയോണിയും അത്ലെറ്റിക്കോ മാഡ്രിഡും വീണ്ടും യുവന്റസിനോടേറ്റു മുട്ടും.

കഴിഞ്ഞ സീസണിൽ നോക്കൗട്ട് സ്റ്റേജിൽ ക്രിസ്റ്റ്യാനോ റൊണാൾഡോയുടെ തകർപ്പൻ പ്രകടനത്തിന്റെ പിൻബലത്തിലാണ് യുവന്റസ് അത്ലെറ്റിക്കോയെ പരാജയപ്പെടുത്തിയത്. ജർമ്മൻ ടീമായ ബയേർ ലെവർകൂസനും ലോക്കോമോട്ടീവ് മോസ്കോയുമാണ് ഗ്രൂപ്പ് ഡിയിലെ മറ്റു എതിരാളികൾ. ഗ്രൂപ്പ് എച്ചിൽ യൂറോപ്പ ചാമ്പ്യന്മാരായ ചെൽസിക്കും കഴിഞ്ഞ സീസണിലെ കറുത്ത കുതിരകളായ അയാക്സിനും ഫ്രഞ്ച് ടീമായ ലില്ലെയ്ക്കും ഒപ്പമാണ് വലൻസിയ. കഴിഞ്ഞ സീസണിലെ ചാമ്പ്യൻസ് ലീഗ് ഗ്രൂപ്പ് സ്റ്റേജിലെ തോൽവി മറക്കാനുതകുന്ന പ്രകടനമാവും വലൻസിയ ലക്ഷ്യം വെക്കുന്നത്.

താരതമ്യേന ഭേദപ്പെട്ട ഗ്രൂപ്പിലാണ് ടോട്ടെൻഹാം ഹോട്ട്സ്പർസും ബയേൺ മ്യൂണിക്കും എത്തിപ്പെട്ടിരിക്കുന്നത്. ഗ്രൂപ്പ് ബിയിൽ ബയേണും ടോട്ടെൻഹാമും റെഡ് സ്റ്റാർ ബെൽഗ്രേഡും ഒളിമ്പ്യാക്കോസുമാണുള്ളത്. റെഡ് സ്റ്റാറും ഒളിമ്പ്യാക്കോസും ഉള്ളതിനാൽ ഗ്രൂപ്പ് സ്റ്റേജ് കടക്കാൻ ഇരു ടീമുകൾക്കും ആകുമെങ്കിലും കരുത്തരാരെന്ന ചോദ്യം മാത്രമാണ് ബാക്കി. റെഡ് സ്റ്റാർ ബെൽഗ്രേഡുമായി സെപ്റ്റംബർ 19 നാണ് ബയേൺ മ്യൂണിക്കിന്റെ ആദ്യ മത്സരം.

ഒക്ടോബർ രണ്ടിന് ടോട്ടെൻഹാം ബയേൺ പോരാട്ടം നടക്കും. ബെൽഗ്രേഡിലെ എവേ മാച്ചുകൾ എല്ലാ യൂറോപ്യൻ ടീമുകൾക്കും വെല്ലുവിളിയാണ്. ഗാലറിയെ തീ ജ്വാലയാക്കി മാറ്റുന്ന ഫുട്ബോൾ ആവേശം ബെൽഗ്രേഡിന്റെ പ്രത്യേകതയാണ്. കഴിഞ്ഞ തവണ കൈവിട്ട കിരീടം ഇത്തവണ സ്വന്തമാക്കനാകും ടോട്ടെൻഹാം ഹോട്ട്സ്പർസ് ശ്രമിക്കുക.

ലയണൽ മെസ്സിയെ പുകഴ്ത്തി ക്രിസ്റ്റ്യാനോ റൊണാൾഡോ.
യുവേഫ‌ ചാമ്പ്യൻസ് ലീഗ് ഗ്രൂപ്പ് ഡ്രോയുടെ ഇടയിൽ ഫുട്ബോൾ ലോകത്തെ കൗതുകം കൊള്ളിച്ച ഒരു കാര്യം നടന്നു. അവതാരിക ലയണൽ മെസ്സിക്ക് അടുത്തിരിക്കുന്ന ക്രിസ്റ്റ്യാനോ റൊണാൾഡോയോട് മെസ്സിയെക്കുറിച്ച് ആരാഞ്ഞു. മറുപടിയായി ഫുട്ബോൾ ആരാധകരെ ആവേശത്തിലാഴ്ത്തിയ വാക്കുകളാണ് കാണികൾ കേട്ടത്. 15 വർഷത്തോളമായി ഇതേ വേദി മെസ്സിയും റൊണാൾഡോയും പങ്കിടാൻ തുടങ്ങിയിട്ട്. ഇത്തരത്തിലൊരു റൈവലറി ഫുട്ബോൾ ചരിത്രത്തിൽ ഉണ്ടായിരുന്നോ എന്ന് പോലും സംശയമാണെന്നും അദ്ദേഹം പറഞ്ഞു.

സ്പെയിനിൽ ഫുട്ബോൾ കളിക്കുന്നതിനെക്കുറിച്ചും റൊണാൾഡോ വാചാലനായി. ലാ ലീഗയെ താൻ മിസ്സ് ചെയ്യുന്നുണ്ടെന്നും മെസ്സിക്ക് എതിരാളിയായി താനുണ്ടായത് ഇരു താരങ്ങളുടെ കരിയറിലും നേട്ടങ്ങൾ മാത്രമാണ് ഉണ്ടാക്കിയതെന്നും റൊണാൾഡോ പറഞ്ഞു. കഴിഞ്ഞ സീസണിലാണ് റയൽ മാഡ്രിഡ് വിട്ട് യുവന്റസിലേക്ക് റൊണാൾഡോ ചുവട് മാറ്റിയത്. കഴിഞ്ഞ സീസണിൽ ഇറ്റലിയിൽ റൊണാൾഡോയും സ്പെയിനിൽ മെസ്സിയും കിരീടമുയർത്തിയിരുന്നു.