മാഞ്ചസ്റ്റർ യുണൈറ്റഡ് സ്വന്തമാക്കാനുള്ള ശ്രമത്തിൽ ഖത്തർ വിജയിക്കുന്നതായി റിപ്പോർട്ടുകൾ. ഗ്ലേസേഴ്സ് ഖത്തർ ഗ്രൂപ്പിന് മാഞ്ചസ്റ്റർ യുണൈറ്റഡിനെ വിൽക്കാൻ തയ്യാറാകുന്നതായി സൺ റിപ്പോർട്ട് ചെയ്യുന്നു. റാറ്റ്ക്ലിഫ് പരാജയപ്പെടുമെന്നും യുണൈറ്റഡിന്റെ സ്വന്തമാക്കാനുള്ള മത്സരത്തിൽ ഖത്തറ്റ് ഗ്രൂപ്പ് ഏറെ മുന്നിൽ ആണ് എന്നും റിപ്പോർട്ടിൽ പറയുന്നു. ഈ വർഷം നവംബറോടെ ഗ്ലേസേഴ്സ് വിൽപ്പന പൂർത്തിയാക്കി ക്ലബ് ഒഴിയും എന്നും റിപ്പോർട്ടിൽ പറയുന്നു.
പല സാമ്പത്തിക നിരീക്ഷകരും ഖത്തർ ഗ്രൂപ്പ് മാഞ്ചസ്റ്റർ യുണൈറ്റഡിനെ സ്വന്തമാക്കുന്നതിന് അടുത്താണ് എന്ന് നേരത്തെ റിപ്പോർട്ട് ചെയ്തിരുന്നു. പക്ഷെ ഗ്ലേസേഴ്സിന്റെ ഭാഗത്ത് നിന്ന് പ്രതികരണം ഒന്നും ഇല്ലാതിരുന്നത് കാര്യങ്ങൾ അനിശ്ചിതത്വത്തിൽ ആക്കിയിരുന്നു.
ഷെയ്ഖ് ജാസിം ബിൻ ഹമദ് അൽ താനിയുടെ ഖത്തർ ഗ്രൂപ്പും റാറ്റ്ക്ലിഫിന്റെ ഇനിയോസ് ഗ്രൂപ്പും ആണ് യുണൈറ്റഡിനായി ബിഡ് ചെയ്തിരിക്കുന്നത്. റാറ്റ്ക്ലിഫിന്റെ ബിഡ് 4 ബില്യൺ മാത്രമാണ്. പക്ഷെ ആ ബിഡ് ഗ്ലേസേഴ്സിന് രണ്ട് വർഷം കൂടെ യുണൈറ്റഡിൽ തുടരാനുള്ള അനുമതി കൊടുക്കും. 20% ഓഹരിയും ഗ്ലേസേഴ്സിന് നിലനിർത്താൻ ആകും.
ഖത്തർ ഗ്രൂപ്പ് അവസാന ബിഡ് കഴിഞ്ഞ മാസം സമർപ്പിച്ചിരുന്നു. 7 ബില്യണോളം ആണ് ഖത്തർ ഗ്രൂപ്പിന്റെ ബിഡ് എന്നാണ് റിപ്പോർട്ടുകൾ. പി എസ് ജി ക്ലബ് ഉടമകളും ഷെയ്ഖ് ജാസിം ബിൻ ഹമദ് അൽ താനിയുടെ ബിഡിനെ സഹായിക്കുന്നുണ്ട്. റാറ്റ്ക്ലിഫിനെ വെച്ച് ഖത്തർ ഗ്രൂപ്പിൽ നിന്ന് കൂടുതൽ പണം വാങ്ങാൻ ആണ് ഇതുവരെ ഗ്ലേസേഴ്സ് ശ്രമിച്ചത് എന്നും 7 ബില്യണ് അടുത്തുള്ള ഖത്തർ ബിഡ് അവർ സ്വീകരിക്കും എന്നും ചില അറബ് മാധ്യമങ്ങളും റിപ്പോർട്ട് ചെയ്യുന്നു.
കളിക്കളത്തിലും പുറത്തും ക്ലബ്ബിനെ പഴയ പ്രതാപത്തിലേക്ക് തിരികെ കൊണ്ടുവരാൻ ലക്ഷ്യമിടുന്ന ഖത്തറിന്റെ ബിഡ് ക്ലബിന്റെ 100% ഓഹരികളും സ്വന്തമാക്കാനായുള്ളതാണ്. ബിഡ് പൂർണമായും കടരഹിതമാണ്. മാഞ്ചസ്റ്റർ യുണൈറ്റഡിനെ വാങ്ങാനുള്ള ബിഡുകളിൽ കടം വാങ്ങാതെ ക്ലബിനെ വാങ്ങാം എന്ന് പറയുന്ന ഏക ബിഡ് ഖത്തറിന്റേതാണ്. ഫുട്ബോൾ ടീം, പരിശീലന കേന്ദ്രം, സ്റ്റേഡിയം, വിശാലമായ അടിസ്ഥാന സൗകര്യങ്ങൾ എന്നിവയിൽ നിക്ഷേപങ്ങൾ നടത്തും എന്ന് ഖത്തർ ഗ്രൂപ്പ് പറയുന്നു. ഷെയ്ഖ് ജാസിമിന്റെ 92 ഫൗണ്ടേഷനിലൂടെയാണ് ബിഡ് സമർപ്പിച്ചിരിക്കുന്നത്.
