പ്രീമിയർ ലീഗിൽ സ്വന്തം തട്ടകത്തിൽ ചെൽസിക്കെതിരെ ടോട്ടൻഹാം ഹോട്സ്പർ 2-0ന്റെ നിർണായക വിജയം ഉറപ്പിച്ചു. ലണ്ടൻ ഡെർബിയിൽ ചെൽസി അവരുടെ മോശം ഫോം തുടരുന്നതാണ് കണ്ടത്. സംഭവ ബഹുലനായിരുന്നു എങ്കിലും ആദ്യ പകുതിയിൽ ഗോൾ ഒന്നും പിറന്നില്ല. എന്നാൽ രണ്ടാം പകുതിയുടെ തുടക്കത്തിൽ തന്നെ ഒരു ഗോൾ വന്നു. ഒലിവർ സ്കിപ്പിന്റെ വിസ്മയകരമായ ഒരു ലോംഗ് റേഞ്ച് ഗോളാണ് ചെൽസി ഗോൾകീപ്പർ കെപയെ കീഴ്പ്പെടുത്തി വലയിലേക്ക് കയറിയത്.
ബ്ലൂസ് തിരിച്ചുവരവിന് ശ്രമിച്ചെങ്കിലും നല്ല അവസരങ്ങൾ പിറന്നില്ല. ഇന്നത്തേത് അടക്കം അവസാന ആറു മത്സരങ്ങളിൽ ചെൽസി ആകെ ഒരു ഗോളാണ് സ്കോർ ചെയ്തത്‌. 81-ാം മിനിറ്റിൽ ഒരു കോർണറിൽ നിന്ന് ഹാരി കെയ്ൻ ലീഡ് ഇരട്ടിയാക്കിയതോടെ ആതിഥേയർ വിജയം ഉറപ്പിച്ചു.
ഫലം പ്രീമിയർ ലീഗ് ടേബിളിൽ 25 മത്സരങ്ങളിൽ നിന്ന് 45 പോയിന്റുമായി സ്പർസിനെ 4-ാം സ്ഥാനത്ത് നിർത്തുകയാണ്. അതേസമയം, അവസാന 11 മത്സരങ്ങളിൽ ഒന്ന് മാത്രം ജയിച്ച ചെൽസി 31 പോയിന്റുമായി പത്താം സ്ഥാനത്താണ് നിൽക്കുന്നത്. ചെൽസി അവസാന ആറു മത്സരങ്ങളിൽ ഒന്ന് പോലും ജയിച്ചിട്ടില്ല.
