ലിവർപൂൾ താരം തിയാഗോക്ക് കൊറോണ വൈറസ് ബാധ

ട്രാൻസ്ഫർ വിൻഡോയിൽ ലിവർപൂൾ സ്വന്തമാക്കിയത് സൂപ്പർ താരം തിയാഗോ അൽകന്റാറക്ക് കൊറോണ വൈറസ് ബാധ സ്ഥിരീകരിച്ചു. താരത്തിന് കൊറോണ വൈറസ് ബാധ സ്ഥിരീകരിച്ച വിവരം ലിവർപൂൾ തന്നെയാണ് അറിയിച്ചത്. നിലവിൽ താരത്തിന് ചെറിയ ലക്ഷണങ്ങൾ മാത്രമാണ് ഉള്ളതെന്നും പ്രോട്ടോകാൾ പ്രകാരം താരം ഐസൊലേഷനിൽ ആണെന്നും ലിവർപൂൾ അറിയിച്ചിട്ടുണ്ട്.

കുറച്ച് ദിവസങ്ങൾക്ക് മുൻപ് മാത്രമാണ് ബയേൺ മ്യൂണിക്കിൽ നിന്ന് 25 മില്യൺ പൗണ്ടിന് തിയാഗോ ലിവർപൂളിൽ എത്തിയത്. തുടർന്ന് ചെൽസിക്കെതിരായ മത്സരത്തിൽ രണ്ടാം പകുതിയിൽ താരം ലിവർപൂളിന് വേണ്ടി അരങ്ങേറ്റം നടത്തുകയും ചെയ്തിരുന്നു. കൊറോണ വൈറസ് ബാധ സ്ഥിരീകരിച്ചതിനെ തുടർന്ന് തിയാഗോ കഴിഞ്ഞ ദിവസം നടന്ന ലിവർപൂളിനെതിരായ പ്രീമിയർ ലീഗ് മത്സരത്തിൽ കളിച്ചിരുന്നില്ല. ഇന്റർനാഷണൽ ബ്രേക്കിന് ശേഷം മാത്രമാവും തിയാഗോ ഇനി ലിവർപൂളിന് വേണ്ടി ഇറങ്ങുക.