ടോട്ടൻഹാമിന്റെ ടോപ് ഫോർ പ്രതീക്ഷകൾക്ക് തിരിച്ചടി നൽകികൊണ്ട് നോർത്ത് ലണ്ടൺ ഡെർബിയിൽ ജയിച്ച് കയറി ആഴ്‌സണൽ. ഒന്നിനെതിരെ രണ്ടു ഗോളുകൾക്കായിരുന്നു ആഴ്‌സണലിന്റെ ജയം. ടോട്ടൻഹാം താരം എറിക് ലാമേല ചുവപ്പ് കാർഡ് കണ്ട് പുറത്തുപോയതോടെ 10 പേരുമായാണ് ടോട്ടൻഹാം മത്സരം പൂർത്തിയാക്കിയത്. ഒരു ഗോളിന് പിറകിൽ നിന്നതിന് ശേഷമാണ് മത്സരത്തിൽ രണ്ട് ഗോൾ തിരിച്ചടിച്ച് ആഴ്‌സണൽ ജയം സ്വന്തമാക്കിയത്.
ടോട്ടൻഹാമിന് വേണ്ടി എറിക് ലാമേലയാണ് മത്സരത്തിന്റെ 33ആം മിനുട്ടിൽ ആദ്യ ഗോൾ നേടിയത്. ഒരു റബോണ ഷോട്ടിലൂടെയാണ് ലമേല ആഴ്‌സണൽ ഗോൾ വല കുലുക്കിയത്. എന്നാൽ ആദ്യ പകുതി അവസാനിക്കുന്നതിന് തോട്ടമുൻപ് തന്നെ റയൽ മാഡ്രിഡിൽ നിന്ന് ലോണിൽ ആഴ്‌സണലിൽ എത്തിയ മാർട്ടിൻ ഓഡെഗാർഡ് സമനില ഗോൾ നേടി. തുടർന്ന് രണ്ടാം പകുതിയിൽ പെനാൽറ്റി ബോക്സിൽ ആഴ്‌സണൽ താരം ലാകസറ്റെയെ ടോട്ടൻഹാം താരം സാഞ്ചസ് ഫൗൾ ചെയ്തതിന് അനുകൂലമായി ലഭിച്ച പെനാൽറ്റി ഗോളാക്കി ലാകസറ്റെ ആഴ്സണലിന് ജയം നേടികൊടുക്കുകയായിരുന്നു.
തുടർന്ന് എട്ട് മിനുറ്റിനിടെ രണ്ട് മഞ്ഞ കാർഡ് കണ്ട് ലാമേല പുറത്തുപോയതോടെ ടോട്ടൻഹാം 10 പേരായി ചുരുങ്ങുകയും ചെയ്തു. 10 പേരായി ചുരുങ്ങിയിട്ടും സമനില ഗോളിന് വേണ്ടി പരിശ്രമിച്ച ടോട്ടൻഹാം ഹാരി കെയ്‌നിലൂടെ ആഴ്‌സണൽ ഗോൾ വല കുലുക്കിയെങ്കിലും റഫറി ഓഫ്‌സൈഡ് വിളിച്ചത് അവർക്ക് തിരിച്ചടിയായി.
