ഡബ്യു.ടി.എ ഫൈനൽസ് ഫൈനലിൽ ആറാം സീഡ് കരോളിന ഗാർസിയയും ഏഴാം സീഡ് ആര്യാന സബലങ്കയും ഏറ്റുമുട്ടും. അഞ്ചാം സീഡ് ഗ്രീക്ക് താരം മരിയ സക്കാറിയെ നേരിട്ടുള്ള സെറ്റുകൾക്ക് തോൽപ്പിച്ചു ആണ് ഗാർസിയ ഫൈനലിൽ എത്തിയത്. നാലു തവണ എതിരാളിയെ ബ്രേക്ക് ചെയ്ത ഗാർസിയ 6-3, 6-2 എന്ന സ്കോറിന് ജയം കാണുക ആയിരുന്നു. കരിയറിലെ ഏറ്റവും വലിയ ഫൈനൽ ആണ് ഗാർസിയക്ക് ഇത്.
അതേസമയം ഒന്നാം നമ്പർ താരം ഇഗ സ്വിറ്റകിനെ ആര്യാന സബലങ്ക മൂന്നു സെറ്റ് പോരാട്ടത്തിൽ വീഴ്ത്തുക ആയിരുന്നു. 6-2, 2-6, 6-1 എന്ന സ്കോറിന് ആയിരുന്നു സബലങ്കയുടെ ജയം. 12 ഏസുകൾ മത്സരത്തിൽ ഉതിർത്ത സബലങ്ക 6 തവണ എതിരാളിയെ ബ്രേക്ക് ചെയ്യുകയും ചെയ്തു. ഈ സീസണിൽ സബലങ്ക ആദ്യമായി ആണ് ഇഗയെ തോൽപ്പിക്കുന്നത്. കരിയറിലെ ഏറ്റവും വലിയ ഫൈനൽ ആണ് സബലങ്കക്കും ഇത്.
