യു.എസ് ഓപ്പൺ ക്വാർട്ടർ ഫൈനലിലേക്ക് മുന്നേറി ലോക ഒന്നാം നമ്പർ ഇഗ സ്വിറ്റെക്. 108 റാങ്കുകാരിയായ ജർമ്മൻ താരം ജൂൾ നെയ്മെയിറിന് എതിരെ ആദ്യ സെറ്റ് കൈവിട്ട ശേഷം തിരിച്ചു വന്നാണ് ഇഗ നാലാം റൗണ്ടിൽ ജയം കണ്ടത്. ഇതോടെ യു.എസ് ഓപ്പൺ ക്വാർട്ടർ ഫൈനലിൽ എത്തുന്ന ആദ്യ പോളണ്ട് വനിത താരമായി ഇഗ. ആദ്യ സെറ്റ് 6-2 നു നേടിയ ജർമ്മൻ താരം ഇഗയെ ഞെട്ടിച്ചു.
എന്നാൽ രണ്ടാം സെറ്റ് മുതൽ ഇഗ തിരിച്ചടിച്ചു. 6-4 നു രണ്ടാം സെറ്റ് നേടി മത്സരം മൂന്നാം സെറ്റിലേക്ക് പോളണ്ട് താരം നീട്ടി. മൂന്നാം സെറ്റിൽ എതിരാളിക്ക് ഒരവസരവും നൽകാതെ ബാഗൽ നേടി ഇഗ. 6-0 സെറ്റ് നേടിയ താരം അവസാന എട്ടിലേക്ക് മാർച്ച് ചെയ്തു. ഈ സീസണിൽ ഇഗ നേടുന്ന 19 മത്തെ ബാഗൽ ആയിരുന്നു ഇത്. ക്വാർട്ടർ ഫൈനലിൽ ജെസിക്ക പെഗ്യുല ആണ് ഇഗയുടെ എതിരാളി.
