ആർതർ ആഷെ സ്റ്റേഡിയത്തിൽ നടന്ന യുഎസ് ഓപ്പൺ ഫൈനലിൽ യാനിക് സിന്നറെ നാല് സെറ്റുകൾക്ക് പരാജയപ്പെടുത്തി കാർലോസ് അൽക്കാരസ് തന്റെ ആറാം ഗ്രാൻഡ് സ്ലാം കിരീടം നേടി. ഈ വിജയത്തോടെ അൽക്കാരസ് ലോക ഒന്നാം നമ്പർ റാങ്ക് തിരിച്ചുപിടിച്ചു. 6-2, 3-6, 6-1, 6-4 എന്ന സ്കോറിനാണ് 22-കാരനായ സ്പാനിഷ് താരം സിന്നറെ തോൽപ്പിച്ചത്. ഈ വർഷം വിംബിൾഡണിൽ തോറ്റതിന് അൽക്കാരസ് കണക്ക് തീർക്കുകയും ചെയ്തു.
Tag: US Open
സബലെങ്കയ്ക്ക് യുഎസ് ഓപ്പൺ കിരീടം; അനിസിമോവയെ കീഴടക്കി കിരീടം നിലനിർത്തി
അമാൻഡ അനിസിമോവയെ 6-3, 7-6(3) എന്ന സ്കോറിന് പരാജയപ്പെടുത്തി അര്യാന സബലെങ്ക യുഎസ് ഓപ്പൺ കിരീടം നിലനിർത്തി. ഈ വിജയത്തോടെ സബലെങ്ക തന്റെ നാലാം ഗ്രാൻഡ് സ്ലാം കിരീടം നേടി. ലോക ഒന്നാം നമ്പർ താരമായ സബലെങ്ക ആർതർ ആഷെ സ്റ്റേഡിയത്തിൽ തന്റെ മികവ് തെളിയിച്ചു. നിർണായക ഘട്ടങ്ങളിൽ ശക്തമായ പ്രകടനം കാഴ്ചവെച്ച സബലെങ്ക, അനിസിമോവയുടെ പിഴവുകൾ മുതലെടുത്തു.
ഈ വർഷമാദ്യം ഓസ്ട്രേലിയൻ, ഫ്രഞ്ച് ഓപ്പൺ ഫൈനലുകളിൽ പരാജയപ്പെട്ടതിന് ശേഷമുള്ള സബലെങ്കയുടെ മികച്ച തിരിച്ചുവരവുകൂടിയാണിത്. രണ്ടാം സെറ്റിൽ അനിസിമോവ ഒരു ഘട്ടത്തിൽ മുന്നിട്ട് നിന്നെങ്കിലും, സബലെങ്കയുടെ മികച്ച പ്രകടനം വിജയത്തിലേക്ക് നയിച്ചു. ഈ വർഷം ടൈബ്രേക്കിൽ സബലെങ്ക നേടുന്ന തുടർച്ചയായ 19-ാം വിജയമാണിത്.
കാർലോസ് അൽകാരസ് നോവാക് ജോക്കോവിച്ചിനെ തോൽപ്പിച്ച് യുഎസ് ഓപ്പൺ ഫൈനലിൽ
കാർലോസ് അൽകാരസ് നൊവാക് ജോക്കോവിച്ചിനെ നേരിട്ടുള്ള സെറ്റുകൾക്ക് പരാജയപ്പെടുത്തി കൊണ്ട് യു എസ് ഓപ്പൺ ഫൈനലിലേക്ക് മുന്നേറി. 22-കാരനായ സ്പാനിഷ് താരം 6-4, 7-6 (7/4), 6-2 എന്ന സ്കോറിന് ആണ് 38-കാരനായ ഇതിഹാസ താരത്തെ കീഴ്പ്പെടുത്തിയത്. ഇതോടെ, റെക്കോർഡ് 25-ആം ഗ്രാൻഡ് സ്ലാം സിംഗിൾസ് കിരീടം നേടാനുള്ള ജോക്കോവിച്ചിന്റെ സ്വപ്നം നീണ്ടു.
ഈ വിജയത്തോടെ അൽകാരസ് തന്റെ രണ്ടാം യുഎസ് ഓപ്പൺ ഫൈനലിലെത്തി. അതുകൂടാതെ ഹാർഡ് കോർട്ടിൽ ജോക്കോവിച്ചിനെതിരെ അൽകാരസിന്റെ ആദ്യ വിജയം കൂടിയാണിത്.
ആദ്യ ഗെയിം മുതൽ കളി നിയന്ത്രിച്ചത് അൽകാരസായിരുന്നു, തുടക്കത്തിൽ തന്നെ ജോക്കോവിച്ചിനെ ബ്രേക്ക് ചെയ്ത് താരം തന്റെ ആധിപത്യം ഉറപ്പിച്ചു. രണ്ടാം സെറ്റിൽ ജോക്കോവിച്ച് 3-0ന് മുന്നിലെത്തി തിരിച്ചുവരവിന് ശ്രമിച്ചെങ്കിലും, സ്പാനിഷ് താരത്തിന്റെ ഊർജ്ജസ്വലത കളിയുടെ ഗതി മാറ്റി. തിരിച്ചെത്തിയ അൽകാരസ്, ടൈബ്രേക്ക് നേടി, ലീഡ് വിട്ടുകൊടുക്കാതെ പിടിച്ചുനിന്നു.
ഇനി എല്ലാവരുടെയും കണ്ണുകൾ, നിലവിലെ ചാമ്പ്യൻ യാനിക് സിന്നർ-ഉം അൽകാരസ്-ഉം ഫൈനലിൽ ഏറ്റുമുട്ടുമോ എന്ന അറിയാനുള്ള രണ്ടാം സെമി പോരാട്ടത്തിലേക്കാണ്. കനേഡിയൻ താരം ഫെലിക്സ് ഓഗർ-അലിയാസിമെയുമായാണ് സിന്നറിന്റെ സെമി പോരാട്ടം.
മൂന്നു മണിക്കൂർ പോരാട്ടത്തിൽ ഒസാക്കയെ വീഴ്ത്തി അനിസിമോവ യു.എസ് ഓപ്പൺ ഫൈനലിൽ
വിംബിൾഡൺ ഫൈനലിൽ ഇഗ സ്വിറ്റെകിനോട് 6-0, 6-0 എന്ന സ്കോറിന് ഹൃദയഭേദകമായി പരാജയപ്പെട്ട ശേഷം തിരിച്ചു വന്നു യു.എസ് ഓപ്പൺ ഫൈനലിലേക്ക് മുന്നേറി അമേരിക്കൻ താരം അമാന്ത അനിസിമോവ. ക്വാർട്ടർ ഫൈനലിൽ ഇഗയെ തോൽപ്പിച്ചു പ്രതികാരം ചെയ്ത എട്ടാം സീഡ് ആയ താരം സെമിഫൈനലിൽ 23 സീഡ് ജപ്പാൻ താരം നയോമി ഒസാക്കയെ ഉഗ്രൻ പോരാട്ടത്തിന് ശേഷമാണ് മറികടന്നത്. ഒസാക്കയെ തുടർച്ചയായ മൂന്നാം മത്സരത്തിലും പരാജയപ്പെടുത്തി അനിസിമോവ. ഒസാക്ക ഗ്രാന്റ് സ്ലാം ക്വാർട്ടർ ഫൈനൽ, സെമി ഫൈനൽ, ഫൈനൽ മത്സരങ്ങളിൽ നേരിടുന്ന കരിയറിലെ ആദ്യ തോൽവിയാണ് ഇത്.
ആക്രമിച്ചു കളിച്ച അനിസിമോവ മത്സരത്തിൽ പേടിയില്ലാതെയാണ് പോരാടിയത്. മൂന്നു സെറ്റ് പോരാട്ടത്തിൽ 46 വിന്നറുകൾ ആണ് അമേരിക്കൻ താരം ഇന്ന് ഉതിർത്തത്. ആദ്യ സെറ്റ് ടൈബ്രേക്കിൽ 7-6 നു നഷ്ടമായ ശേഷം തിരിച്ചു വന്ന അനിസിമോവ രണ്ടാം സെറ്റ് അതേ സ്കോറിന് തന്നെ ടൈബ്രേക്കിൽ തിരിച്ചു നേടി മത്സരം മൂന്നാം സെറ്റിലേക്ക് നീട്ടി. മൂന്നാം സെറ്റിൽ നിർണായക ബ്രേക്ക് കണ്ടത്തിയ അനിസിമോവ സെറ്റ് 6-3 നു നേടി ഫൈനൽ ഉറപ്പിക്കുക ആയിരുന്നു. മത്സരത്തിൽ 15 ഏസുകൾ ഉതിർത്ത ഒസാക്കയുടെ സർവീസ് 6 തവണ അനിസിമോവ ബ്രേക്ക് ചെയ്തു. സ്വന്തം നാട്ടിൽ ആദ്യ ഗ്രാന്റ് സ്ലാം കിരീട നേട്ടം ആവും അനിസിമോവ ഫൈനലിൽ ഒന്നാം സീഡ് ആയ സബലങ്കക്ക് എതിരെ ലക്ഷ്യം വെക്കുക.
തുടർച്ചയായ മൂന്നാം യു.എസ് ഓപ്പൺ ഫൈനലിലേക്ക് മുന്നേറി സബലങ്ക
തുടർച്ചയായ മൂന്നാം യു.എസ് ഓപ്പൺ ഫൈനലിലേക്ക് മുന്നേറി ഒന്നാം സീഡും നിലവിലെ ചാമ്പ്യനും ആയ ആര്യാന സബലങ്ക. ഹാർഡ് കോർട്ട് ഗ്രാന്റ് സ്ലാനുകളിൽ ഇത് തുടർച്ചയായ ആറാം ഫൈനൽ ആണ് സബലങ്കക്ക് ഇത്. 2014 ൽ സാക്ഷാൽ സറീന വില്യംസിന് ശേഷം ഇത് ആദ്യമായാണ് ഒരു താരം തുടർച്ചയായി മൂന്നു യു.എസ് ഓപ്പൺ ഫൈനലുകളിൽ എത്തുന്നത്. 2025 ലെ മൂന്നാം ഗ്രാന്റ് സ്ലാം ഫൈനൽ കൂടിയാണ് സബലങ്കക്ക് ഇത്.
നാലാം സീഡ് അമേരിക്കയുടെ ജെസിക്ക പെഗ്യുലയെ ആദ്യ സെറ്റ് നഷ്ടമായ ശേഷം തിരിച്ചു വന്നാണ് സബലങ്ക മറികടന്നത്. ആദ്യ സെറ്റ് 6-4 നു നഷ്ടമായ ശേഷം രണ്ടാം സെറ്റ് 6-3 നും മൂന്നാം സെറ്റ് 6-4 നും നേടി ഫൈനൽ ഉറപ്പിച്ചു. അമേരിക്കൻ താരത്തിന് എതിരെ പത്താം മത്സരത്തിൽ എട്ടാം ജയം ആണ് സബലങ്ക ഇന്ന് കുറിച്ചത്. മത്സരത്തിൽ 8 ഏസുകൾ ഉതിർത്ത സബലങ്ക 3 തവണ എതിരാളിയുടെ സർവീസ് ഭേദിക്കുകയും ചെയ്തു.
ഇന്ത്യൻ താരം യൂക്കി ഭാംബ്രി കരിയറിലെ ആദ്യ ഗ്രാൻഡ് സ്ലാം സെമിഫൈനലിൽ
യുഎസ് ഓപ്പൺ 2025-ൽ ഇന്ത്യൻ ടെന്നീസ് താരം യൂക്കി ഭാംബ്രി തന്റെ സ്വപ്നക്കുതിപ്പ് തുടരുന്നു. പുരുഷ ഡബിൾസ് സെമിഫൈനലിൽ ആദ്യമായി പ്രവേശിച്ചുകൊണ്ടാണ് ഭാംബ്രി ഈ നേട്ടം കൈവരിച്ചത്. ന്യൂസിലൻഡിന്റെ മൈക്കൽ വീനസുമായി ചേർന്നാണ് ഭാംബ്രി കളിക്കുന്നത്. ബുധനാഴ്ച സ്റ്റേഡിയം 17-ൽ നടന്ന ക്വാർട്ടർ ഫൈനലിൽ, ഉയർന്ന സീഡുകളായ രാജീവ് റാം-നികോള മെക്ടിച്ച് കൂട്ടുകെട്ടിനെ 6-3, 6-7(6), 6-3 എന്ന സ്കോറിന് അട്ടിമറിച്ചാണ് ഇവർ സെമിയിൽ കടന്നത്.
രണ്ടുമണിക്കൂറും 37 മിനിറ്റും നീണ്ടുനിന്ന കടുത്ത പോരാട്ടത്തിൽ 11-ാം സീഡായ രാം-മെക്ടിച്ച് സഖ്യത്തെ 13-ാം സീഡായ ഇൻഡോ-കിവീസ് സഖ്യം പ്രതിരോധിച്ചും സമചിത്തതയോടെയും നേരിട്ടു.
സിംഗിൾസിൽ നിന്ന് ഡബിൾസിലേക്ക് മാറിയും പരിക്കുകളെ അതിജീവിച്ചും വർഷങ്ങളോളം പോരാടിയ ഭാംബ്രിക്ക് ഈ ഗ്രാൻഡ് സ്ലാം സെമിഫൈനൽ പ്രവേശനം ഒരു വലിയ നാഴികക്കല്ലാണ്. കഴിഞ്ഞ സീസണിൽ ആൽബാനോ ഒലിവെറ്റിയുമായി ചേർന്ന് യുഎസ് ഓപ്പൺ പ്രീ-ക്വാർട്ടറിൽ അദ്ദേഹം എത്തിയിരുന്നു. 2015-ൽ ലിയാൻഡർ പേസിന് ശേഷം യുഎസ് ഓപ്പൺ പുരുഷ ഡബിൾസ് കിരീടം നേടുന്ന ആദ്യ ഇന്ത്യൻ താരമാകാൻ ഭാംബ്രിക്ക് ഇനി രണ്ട് മത്സരങ്ങൾ മാത്രം മതി.
അടുത്ത മത്സരം: സെമിഫൈനൽ എതിരാളി, സമയവും തത്സമയ സംപ്രേക്ഷണ വിവരങ്ങളും
എതിരാളികൾ: നീൽ സ്കുപ്സ്കി & ജോ സാലിസ്ബറി (ഗ്രേറ്റ് ബ്രിട്ടൻ, 6-ാം സീഡ്)
തിയ്യതി, സമയം: സെപ്റ്റംബർ 5 വെള്ളിയാഴ്ച (പുലർച്ചെ 1:30 IST-ന് ശേഷം മത്സരം ആരംഭിക്കും)
വേദി: യുഎസ്ടിഎ ബില്ലി ജീൻ കിംഗ് നാഷണൽ ടെന്നീസ് സെന്റർ, ന്യൂയോർക്ക്
തത്സമയ സംപ്രേക്ഷണം: ഡിസ്നി+ ഹോട്ട്സ്റ്റാർ (ഇന്ത്യ), തിരഞ്ഞെടുക്കപ്പെട്ട മത്സരങ്ങൾ സ്റ്റാർ സ്പോർട്സ് നെറ്റ്വർക്കിലും സംപ്രേക്ഷണം ചെയ്തേക്കാം.
നവോമി ഒസാക്ക യു.എസ്. ഓപ്പൺ സെമിഫൈനലിലേക്ക് മുന്നേറി
നീണ്ട ഇടവേളയ്ക്ക് ശേഷം കോർട്ടിലേക്ക് തിരിച്ചെത്തിയ നവോമി ഒസാക്ക, 2025-ലെ യു.എസ്. ഓപ്പൺ സെമിഫൈനലിൽ പ്രവേശിച്ച് തന്റെ തിരിച്ചുവരവിൽ ഒരു വലിയ ചുവടുവെപ്പ് കൂടി നടത്തിയിരിക്കുകയാണ്. ക്വാർട്ടർ ഫൈനലിൽ കരോലിന മുച്ചോവയെ 6-4, 7-6(3) എന്ന സ്കോറിന് കീഴടക്കിയാണ് ഒസാക്കയുടെ മുന്നേറ്റം. 23-ാം സീഡായ ഈ ജാപ്പനീസ് താരം ആർതർ ആഷെ സ്റ്റേഡിയത്തിൽ നടന്ന മത്സരത്തിൽ തന്റെ പോരാട്ടവീര്യം കാണിച്ചു.
ഗ്രാൻഡ് സ്ലാം ക്വാർട്ടർ ഫൈനലുകളിൽ 5-0 എന്ന മികച്ച റെക്കോർഡ് നിലനിർത്താനും ഒസാക്കക്ക് സാധിച്ചു. സെമിയിൽ മുൻ ലോക ഒന്നാം നമ്പർ താരം ഇഗ സ്വിയാറ്റെക്കിനെ അട്ടിമറിച്ച അമൻഡ അനിസിമോവയാണ് ഒസാക്കയുടെ എതിരാളി.
നാല് വർഷം മുൻപ് യു.എസ്. ഓപ്പൺ കിരീടം നേടിയതിന് ശേഷം ഒസാക്കയുടെ ആദ്യ സെമിഫൈനൽ പ്രവേശനമാണിത്.
യാന്നിക് സിന്നറുടെ ആധിപത്യം തുടരുന്നു: എട്ടാം ഗ്രാൻഡ് സ്ലാം സെമിഫൈനലിൽ
യാനിക് സിന്നർ പുരുഷ ടെന്നീസിലെ ഏറ്റവും സ്ഥിരതയാർന്ന താരമാണെന്ന് ഒരിക്കൽ കൂടി തെളിയിച്ചിരിക്കുന്നു. യു.എസ്. ഓപ്പണിൽ തന്റെ സഹതാരവും അടുത്ത സുഹൃത്തുമായ ലോറെൻസോ മുസെറ്റിയെ 6-1, 6-4, 6-2 എന്ന സ്കോറിന് തോൽപ്പിച്ച് സെമി ഫൈനലിലേക്ക് ഇറ്റാലിയൻ താരം മുന്നേറി. രണ്ടുമണിക്കൂറിൽ താഴെ മാത്രം നീണ്ടുനിന്ന ഈ മത്സരം സമ്മർദ്ദഘട്ടങ്ങളിൽ പോലും സിന്നർക്ക് കളിയുടെ നിയന്ത്രണം ഏറ്റെടുക്കാനുള്ള കഴിവ് എത്രത്തോളമുണ്ടെന്ന് കാണിച്ചുതന്നു. ഈ വിജയത്തോടെ 23-കാരനായ സിന്നർ തന്റെ എട്ടാം ഗ്രാൻഡ് സ്ലാം സെമിഫൈനലിൽ പ്രവേശിച്ചു.
ഈ വിജയത്തോടെ സിന്നർ തുടർച്ചയായ അഞ്ചാം ഗ്രാൻഡ് സ്ലാം സെമിഫൈനലിലും കഴിഞ്ഞ എട്ട് പ്രധാന ടൂർണമെന്റുകളിൽ ഏഴിലും അവസാന നാല് സ്ഥാനങ്ങളിൽ എത്തിയിരിക്കുകയാണ്. ഇതിലും ശ്രദ്ധേയമായ കാര്യം ഹാർഡ് കോർട്ടുകളിലെ അദ്ദേഹത്തിന്റെ ആധിപത്യമാണ്: ഹാർഡ് കോർട്ട് ഗ്രാൻഡ് സ്ലാമുകളിൽ കഴിഞ്ഞ 27 സെറ്റുകളിൽ 26-ലും അദ്ദേഹം വിജയിച്ചു. യു.എസ്. ഓപ്പണിൽ സിന്നറുടെ തുടർച്ചയായ 12-ാം വിജയമാണിത്. കഴിഞ്ഞ വർഷവും അദ്ദേഹം ഇവിടെ സെമിഫൈനലിൽ എത്തിയിരുന്നു.
വെള്ളിയാഴ്ച നടക്കുന്ന സെമിഫൈനലിൽ കാനഡയുടെ ഫെലിക്സ് ഓഗർ-അലിയാസിമിനെയാണ് സിന്നർ അടുത്തതായി നേരിടുക.
വാണ്ട്രൂസോവ പിന്മാറി, അര്യാന സബലെങ്ക യുഎസ് ഓപ്പൺ സെമിഫൈനലിൽ
2025-ലെ യുഎസ് ഓപ്പൺ ക്വാർട്ടർ ഫൈനൽ മത്സരത്തിൽ എതിരാളിയായ മാർക്കറ്റ വാണ്ട്രൂസോവ പരിക്കിനെ തുടർന്ന് പിന്മാറിയതിനാൽ ലോക ഒന്നാം നമ്പർ താരം അര്യാന സബലെങ്ക സെമിഫൈനലിലേക്ക് മുന്നേറി. 2023-ലെ വിംബിൾഡൺ ചാമ്പ്യനായ വാണ്ട്രൂസോവ ഏഴാം സീഡ് ജാസ്മിൻ പയോളിനിയെയും ഒമ്പതാം സീഡ് എലീന റൈബാക്കിനയെയും പരാജയപ്പെടുത്തി മികച്ച ഫോമിലായിരുന്നു. എന്നാൽ പരിശീലനത്തിനിടെയുണ്ടായ കാൽമുട്ടിനേറ്റ പരിക്ക് കാരണം താരത്തിന് മത്സരത്തിൽ നിന്ന് പിന്മാറേണ്ടിവന്നു.
“കാൽമുട്ടിനേറ്റ പരിക്ക് കാരണം ഇന്നത്തെ ക്വാർട്ടർ ഫൈനൽ മത്സരത്തിൽ നിന്ന് പിന്മാറേണ്ടിവന്നതിൽ ഖേദിക്കുന്നു,” വാണ്ട്രൂസോവ അറിയിച്ചു.
മാർക്കറ്റയോടുള്ള തൻ്റെ സഹാനുഭൂതി സബലെങ്ക സോഷ്യൽ മീഡിയയിൽ പങ്കുവെച്ചു. “മാർക്കറ്റയ്ക്ക് സംഭവിച്ചതിൽ എനിക്ക് വിഷമമുണ്ട്. അവൾ മികച്ച രീതിയിൽ കളിക്കുകയായിരുന്നു. ഇത് അവൾക്ക് എത്രത്തോളം വേദനയുണ്ടാക്കുമെന്ന് എനിക്കറിയാം,” സബലെങ്ക കുറിച്ചു.
കഴിഞ്ഞ വർഷത്തെ ഫൈനലിൻ്റെ റീമാച്ചിൽ അമേരിക്കൻ താരം ജെസ്സിക്ക പെഗുലയെയാണ് സബലെങ്ക സെമിഫൈനലിൽ നേരിടുന്നത്.
ജോക്കോവിച് യുഎസ് ഓപ്പൺ സെമിഫൈനലിൽ! ഇനി അൽകാരസിന് എതിരെ
യുഎസ് ഓപ്പൺ ക്വാർട്ടർ ഫൈനലിൽ ടെയ്ലർ ഫ്രിറ്റ്സിനെ നാല് സെറ്റുകൾക്ക് (6-3, 7-5, 3-6, 6-4) പരാജയപ്പെടുത്തി നൊവാക് ജോക്കോവിച്ച് സെമിഫൈനലിൽ പ്രവേശിച്ചു. 24 തവണ ഗ്രാൻഡ് സ്ലാം ജേതാവായ താരം ഇതോടെ ഈ സീസണിൽ നാല് പ്രധാന ടൂർണമെന്റിലും സെമി ഫൈനലിൽ എത്തി.
ഈ വിജയത്തോടെ ജോക്കോവിച്ച്- കാർലോസ് അൽകാരസ് സെമിഫൈനൽ പോരാട്ടത്തിനും കളമൊരുങ്ങി. തൻ്റെ അഞ്ചാമത്തെ യുഎസ് ഓപ്പൺ കിരീടമാണ് ലക്ഷ്യമിടുന്നത്. അൽകാരസിന് എതിരെ ഹാർഡ് കോർട്ടിൽ ജോക്കോവിചിന് മികച്ച റെക്കോർഡ് ആണ്. എന്നാൽ അൽകാരസ് ആകട്ടെ അവസാന 36 മത്സരങ്ങളിൽ 35ഉം ജയിച്ച് തന്റെ ഏറ്റവും മികച്ച ഫോമിലാണ് ഉള്ളത്.
ജെസീക്ക പെഗുല യുഎസ് ഓപ്പൺ സെമിഫൈനലിൽ
യുഎസ് ഓപ്പൺ 2025 സെമിഫൈനലിലേക്ക് ജെസീക്ക പെഗുല അനായാസം മുന്നേറി. ചൊവ്വാഴ്ച നടന്ന മത്സരത്തിൽ 6-3, 6-3 എന്ന സ്കോറിന് രണ്ട് തവണ ഗ്രാൻഡ് സ്ലാം ജേതാവായ ബാർബോറ ക്രെജിക്കോവയെയാണ് പെഗുല പരാജയപ്പെടുത്തിയത്. കഴിഞ്ഞ വർഷത്തെ ഫൈനലിസ്റ്റായ അമേരിക്കൻ താരം, ടൂർണമെന്റിൽ ഒരു സെറ്റ് പോലും നഷ്ടപ്പെടുത്താതെയാണ് മുന്നേറുന്നത്.
ഇരു സെറ്റുകളിലും മികച്ച പ്രകടനം പുറത്തെടുത്ത പെഗുല, ക്രെജിക്കോവയുടെ ദുർബലമായ സർവീസ് മുതലെടുത്ത് ആധിപത്യം സ്ഥാപിച്ചു. വ്യാഴാഴ്ച നടക്കുന്ന സെമിഫൈനലിൽ നിലവിലെ ചാമ്പ്യൻ ആര്യന സബലെങ്കയോ മുൻ വിംബിൾഡൺ ജേതാവ് മാർക്കറ്റ വോൻഡ്രോസോവയോ ആയിരിക്കും പെഗുലയുടെ അടുത്ത എതിരാളി.
അനായാസ ജയവുമായി കൊക്കോ ഗോഫ് യു.എസ് ഓപ്പൺ അവസാന പതിനാറിൽ
അനായാസ ജയവുമായി മൂന്നാം സീഡ് ആയ അമേരിക്കൻ താരം കൊക്കോ ഗോഫ് യു.എസ് ഓപ്പൺ അവസാന പതിനാറിൽ. 28 സീഡ് ആയ പോളണ്ട് താരം മാഗ്ദലനയെ 6-3, 6-1 എന്ന സ്കോറിന് ആണ് ഗോഫ് തകർത്തത്. മത്സരത്തിൽ പൂർണ ആധിപത്യം ആയിരുന്നു ഗോഫിന്.
തുടർച്ചയായ നാലാം സീസണിൽ ആണ് ഗോഫ് യു.എസ് ഓപ്പൺ അവസാന പതിനാറിലേക്ക് മുന്നേറുന്നത്. അതേസമയം നാട്ടുകാരനായ കൊബോളിയെ മറികടന്നു പത്താം സീഡ് ഇറ്റാലിയൻ താരം ലോറൻസോ മുസേറ്റിയും അവസാന പതിനാറിൽ എത്തി. മത്സരത്തിൽ മുസേറ്റി 6-3, 6-2, 2-0 എന്ന സ്കോറിന് മുന്നിട്ട് നിൽക്കുമ്പോൾ എതിരാളി പരിക്കേറ്റു പിന്മാറുകയായിരുന്നു.