യൂറോ കപ്പ് യോഗ്യതയ്ക്കായി റിപ്പബ്ലിക് ഓഫ് അയർലാണ്ടിന് കാത്തിരിക്കണം. എതിരില്ലാത്ത രണ്ട് ഗോളുകൾക്കാണ് അയർലാണ്ടിനെ സ്വിറ്റ്സർലാന്റ് പരാജയപ്പെടുത്തിയത്. ഹാരിസ് സെഫെറോവിചും എഡിമിൽസൺ ഫെർണാണ്ടസുമാണ് സ്വിസ്സ് നിരയ്ക്ക് വേണ്ടി ഗോളടിച്ചത്. ഇന്നത്തെ മത്സരഫലം യൂറോ യോഗ്യതയ്ക്കായുള്ള ഗ്രൂപ്പ് ഡിയെ കൂടുതൽ സങ്കീർണമാക്കി.
ഹാന്റ് ബോൾ കാരണം ചുവപ്പ് കണ്ട് അയർലണ്ട് ഗോളി ഷീമസ് കോൾമാൻ പുറത്ത് പോയിരുന്നു. റിക്കാർഡോ റോഡ്രിഗസിന്റെ പെനാൽറ്റി പുറത്തേക്ക് തട്ടി ഡാരൻ റാണ്ടോൾഫ് അയർലാണ്ടിനെ മത്സരത്തിലേക്ക് തിരിച്ചുകൊണ്ടുവന്നു. എന്നാൽ സബ്ബായി ഇറങ്ങിയ ഫെർണാണ്ടസ് അയർലണ്ട് പോസ്റ്റിലേക്ക് നിറയൊഴിച്ചു. ഡഫിയുടെ കാലിൽ തട്ടിയാണ് പന്ത് വലയിലേക്കെത്തിയത്. മൈക്ക് മക്കാർത്തിയുടെ കീഴിൽ ആദ്യ പരാജയമാണ് റിപ്പബ്ലിക്ക് ഓഫ് അയർലാണ്ട് ഏറ്റുവാങ്ങിയത്. യൂറോ യോഗ്യതയ്ക്കായി ഇനി ഡെന്മാർക്കിനെയാണ് അയർലാണ്ട് നേരിടുക. സ്വിറ്റ്സർലാന്റ് ഗിബ്രൾട്ടാരിനെയും ജോർജിയയേയും നേരിടും.
