ഉത്ഘാടനപരിപാടികൾക്ക് മുമ്പേ തന്നെ ലക്ഷദ്വീപ് സ്‌കൂൾ ഗെയിംസ് ആവേശത്തിലേക്ക് ആന്ത്രോത്ത് എത്തി. അതും അവരുടെ ഏറ്റവും പ്രിയപ്പെട്ട വോളിബോൾ മത്സരങ്ങൾ ആണ് കായികമേളക്ക് തുടക്കം കുറിച്ചത്. ഇന്നലെ രാത്രി ഫ്ളഡ് ലൈറ്റിനു കീഴിൽ നടന്ന മൂന്ന് മത്സരങ്ങൾക്കും നിറഞ്ഞ ഗാലറിയാണ് കുട്ടികളെ സ്വാഗതം ചെയ്തത്. മൂന്ന് സെറ്റ് മത്സരങ്ങൾ ആണ് വോളിബോളിൽ നടത്തിയത്.
ആദ്യ മത്സരത്തിൽ അണ്ടർ 17 ആൺകുട്ടികളിൽ കിൽത്താൻ ദ്വീപിനെ നേരിട്ടുള്ള 2 സെറ്റുകൾക്ക് മറികടന്ന മിനിക്കോയി തങ്ങളുടെ ആദ്യ ജയം കുറിച്ചു. രണ്ടാം മത്സരത്തിൽ അഗത്തിയെ നേരിട്ടുള്ള സെറ്റുകൾക്ക് തകർത്ത ചെത്ത്ലത്ത് ദ്വീപും കരുത്ത് കാട്ടി. അതേസമയം അണ്ടർ 19 മത്സരത്തിൽ നാട്ടുകാർക്ക് ആവേശം നൽകിയ ആന്ത്രോത്ത് കിൽത്താനെ നേരിട്ടുള്ള സെറ്റുകൾക്ക് മറികടന്നപ്പോൾ മിനിക്കോയിയെ മറികടന്ന കവരത്തിയും ജയം കണ്ടു. ഉത്ഘാടനത്തിനു ശേഷം ഇന്ന് മുതൽ രാത്രിയും പകലും കായിക ആവേശത്തിൽ ആവും ആന്ത്രോത്ത്.
