ചെന്നൈ: റുപേ പ്രൈം വോളിബോള്‍ ലീഗ് പവേര്‍ഡ് ബൈ എ23 മൂന്നാം സീസണില്‍ കൊച്ചി ബ്ലൂ സ്‌പൈക്കേഴ്‌സ്‌ അഞ്ച് സെറ്റ് പോരാട്ടത്തിൽ ബംഗളൂരു ടോർപിഡോസിനോട്‌ തോറ്റു. ചെന്നൈ ജവഹര്‍ലാല്‍ നെഹ്‌റു ഇന്‍ഡോര്‍ സ്‌റ്റേഡിയത്തില്‍ നടന്ന കളിയിൽ 12–15, 16–14, 15–13, 13–15, 16-5 എന്ന സ്‌കോറിനായിരുന്നു ബംഗളൂരുവിന്റെ ജയം. തോമസ്‌ ഹെപ്‌റ്റിൻസ്‌റ്റാൾ ആണ്‌ കളിയിലെ താരം.
ഹെപ്‌റ്റിൻസ്‌റ്റാളിന്റെ തകർപ്പൻ സ്‌പൈക്കുകളിലൂടെ ബംഗളൂരുവാണ്‌ ആദ്യ ആക്രമണം തുടങ്ങിയത്‌. എന്നാൽ എറിൻ അതോസ്‌ ഫെരേയ്‌ര, ക്രോൾ ജാൻ എന്നിവരിലൂടെ കൊച്ചി തിരിച്ചടിക്കുകയായിരുന്നു. എറിൻ വർഗീസും തിളങ്ങി. അതോസിന്റെ നിർണായക ബ്ലോക്ക്‌ കൊച്ചിക്ക്‌ ആദ്യ സെറ്റ് സമ്മാനിച്ചു. തുടർന്ന്‌ ഇരുസംഘവും വാശിയോടെ പോരാടി.
അവസാന സെറ്റിൽ മുജീബിന്റെ മികവിൽ ബംഗളൂരു ജയം നേടി.
ഇന്ന്‌ വിശ്രമദിനമാണ്‌. നാളെ കൊൽക്കത്ത തണ്ടർബോൾട്‌സുമായി കാലിക്കറ്റ്‌ ഹീറോസ്‌ കളിക്കും. രണ്ടാം മത്സരത്തിൽ കൊച്ചി മുംബൈ മിറ്റിയോഴ്‌സിനെ നേരിടും.
