ചെന്നൈ, 2024 മാര്‍ച്ച് 11: റൂപേ പ്രൈം വോളിബോള്‍ ലീഗ് പവേര്‍ഡ് ബൈ എ23യുടെ മൂന്നാം സീസണിലെ സൂപ്പര്‍ 5 മത്സരങ്ങളില്‍ ആദ്യജയം ഡല്‍ഹി തൂഫാന്‍സിന്. ചെന്നൈ ജവഹര്‍ലാല്‍ നെഹ്‌റു ഇന്‍ഡോര്‍ സ്‌റ്റേഡിയത്തില്‍ നടന്ന മത്സരത്തില്‍ നേരിട്ടുള്ള സെറ്റുകള്‍ക്കാണ് ലീഗ്ഘട്ടത്തിലെ രണ്ടാം സ്ഥാനക്കാരായ ഡല്‍ഹി തൂഫാന്‍സ്, ബെംഗളൂരു ടോര്‍പ്പിഡോസിനെ തോല്‍പ്പിച്ചത്. സ്‌കോര്‍: 15-13, 18-16, 17-15. സന്തോഷാണ് കളിയിലെ താരം.
ലിബറോ ആനന്ദിന്റെ മികച്ച സേവുകളിലൂടെ ഡല്‍ഹി തൂഫാന്‍സ് ആദ്യ സെറ്റില്‍ കുതിച്ചു, എന്നാല്‍ സെറ്റര്‍ പൗലോ അറ്റാക്കര്‍മാര്‍ക്ക് സമര്‍ഥമായി പാസുകള്‍ നല്‍കിയതോടെ ബെംഗളൂരു ടോര്‍പ്പിഡോസ് ഒപ്പം പിടിച്ചു. ലാസര്‍ ഡോഡിച്ചിനെ തുടര്‍ച്ചയായി ബ്ലോക്ക് ചെയ്ത്, തന്റെ സ്റ്റാര്‍ട്ടിങ് ലൈനപ്പിലെ തിരഞ്ഞെടുപ്പിനെ ന്യായീകരിക്കുന്ന പ്രകടനമായിരുന്നു ബെംഗളൂരുവിനായി മുജീബിന്റേത്. സന്തോഷിന്റെ സൂപ്പര്‍ സെര്‍വുകള്‍ ഡല്‍ഹിയെ വീണ്ടും മുന്നിലെത്തിച്ചു. മധ്യനിരയില്‍ നിന്നുള്ള ഡാനിയല്‍ അപോന്‍സയുടെ മികച്ച പ്രകടനം കൂടിയായതോടെ നേരിയ വ്യത്യാസത്തില്‍ തൂഫാന്‍സ് ആദ്യ സെറ്റ് പിടിച്ചു.
ബെംഗളൂരിനായി മുജീബും ഡല്‍ഹിക്കായി ആയുഷും ആക്രമണനിരയ്ക്ക് പന്തെത്തിച്ചതോടെ കളി മധ്യനിരതാരങ്ങള്‍ തമ്മിലായി. അപ്പോന്‍സയുടെ പ്രതിരോധ ദൗര്‍ബല്യം മുതലെടുത്ത ഹെപ്റ്റിന്‍സ്റ്റാളിലൂടെ ബെംഗളൂരു ടോര്‍പ്പിഡോസ് തിരിച്ചടിക്ക് കോപ്പുകൂട്ടി. എന്നാല്‍ ബെംഗളൂരിന്റെ രണ്ട് ബ്ലോക്ക് പിഴവുകള്‍ ഡല്‍ഹിയുടെ സ്‌കോര്‍ ഉയര്‍ത്തി. ഹെപ്റ്റിന്‍സ്റ്റാളിന്റെ ആക്രമണത്തിലെ നിര്‍ണായക പിഴവിന് ടോര്‍പ്പിഡോസിന് വലിയ വില നല്‍കേണ്ടി വന്നു, സെറ്റും കളിയും ഡല്‍ഹിയുടെ നിയന്ത്രണത്തിലായി.
ആനന്ദ് തന്റെ മികവ് തുടര്‍ന്നു, സന്തോഷ് സ്‌പൈക്കുകളിലൂടെ സ്‌കോര്‍ ഉയര്‍ത്തി. അപ്പോന്‍സയുടെ നേതൃത്വത്തിലുള്ള ഡല്‍ഹിയുടെ മൂന്ന് താരങ്ങള്‍ ബ്ലോക്കിങില്‍ വെല്ലുവിളി ഉയര്‍ത്തിയെങ്കിലും, ഐബിന്റെ സാനിധ്യം ടോര്‍പ്പിഡോസിന് ആക്രമണത്തില്‍ വൈദഗ്ധ്യം നല്‍കി. പക്ഷേ ഡല്‍ഹി ക്യാപ്റ്റന്‍ സഖ്‌ലെയ്ന്‍ താരിഖിന്റെ സമര്‍ഥമായ പാസ്, ടോര്‍പ്പിഡോസിന്റെ പ്രതിരോധം തെറ്റിച്ചു. കോര്‍ട്ടിലെ എല്ലാ മൂലയില്‍ നിന്നും ഡല്‍ഹിയുടെ ആക്രണമങ്ങളെത്തി. ഐബിനിലൂടെ ബെംഗളൂരു തിരിച്ചടിക്ക് ശ്രമിച്ചെങ്കിലും, സന്തോഷിന്റെ ഇടിമുഴക്കമുള്ള സ്‌പൈക്കിലൂടെ ഡല്‍ഹി ജയത്തോടെ കളി അവസാനിപ്പിച്ചു.
ഇന്ന് (ചൊവ്വ) വൈകിട്ട് 6.30ന് നടക്കുന്ന മത്സരത്തില്‍ ബെംഗളൂരു ടോര്‍പ്പിഡോസ് അഹമ്മദാബാദ് ഡിഫന്‍ഡേഴ്‌സിനെ നേരിടും. തുടക്കത്തില്‍ മുന്നേറിയ അഹമ്മദാബാദ് മൂന്നാം സ്ഥാനക്കാരായാണ് ലീഗ് റൗണ്ട് പൂര്‍ത്തിയാക്കിയത്. നാലാം സ്ഥാനത്തായിരുന്നു ബെംഗളൂരിന്റെ ഫിനിഷിങ്. ലീഗ് റൗണ്ടില്‍ ആദ്യ സ്ഥാനങ്ങളിലും അഞ്ച് ടീമുകളാണ് സൂപ്പര്‍ ഫൈവ്‌സ് റൗണ്ടില്‍ പരസ്പരം ഏറ്റുമുട്ടുന്നത്. മത്സരങ്ങള്‍ സോണി സ്‌പോര്‍ട്‌സ് നെറ്റ്‌വര്‍ക്കിലും സോണി ലിവിലും തത്സമയം കാണാം.
