വേൾഡ് ഗെയിംസ് അത്‌ലറ്റ് ഓഫ് ദി ഇയർ 2021 അവാർഡ്, നമ്മുടെ ശ്രീജേഷ് ബഹുദൂരം മുന്നിൽ

വേൾഡ് ഗെയിംസ് അത്‌ലറ്റ് ഓഫ് ദി ഇയർ 2021 അവാർഡിനു വേണ്ടിയുള്ള വോട്ടെടുപ്പിൽ മലയാളിയായ പിആർ ശ്രീജേഷ് ബഹുദൂരം മുന്നിൽ. ജനുവരി പത്തിന് തുടങ്ങിയ ഓൺലൈൻ വോട്ടെടുപ്പ് ജനുവരി 31നു അവസാനിക്കും, നിലവിലെ വോട്ടുകൾ അനുസരിച്ചു ശ്രീജേഷ് മറ്റുള്ള എതിരാളികളേക്കാൾ ബഹുദൂരം മുന്നിലാണ്.

കഴിഞ്ഞ വര്ഷം നടന്ന ഒളിമ്പികിൽ ഇന്ത്യൻ ഹോക്കി ടീമിനെ വെങ്കലത്തിലേക്ക് നയിച്ചതാണ് ശ്രീജേഷിനെ പട്ടികയിൽ ഉൾപെടുത്താൻ കാരണം. ഇന്ത്യക്ക് വേണ്ടി 240 മത്സരങ്ങളിൽ ഏറെ വല കാത്ത ശ്രീജേഷ് ഈ അവാർഡ് വിജയിക്കുകയാണെങ്കിൽ അവാർഡ് നേടുന്ന രണ്ടാമത്തെ മാത്രം ഇന്ത്യൻ ഹോക്കി താരമായി മാറും. 2020ൽ ഇന്ത്യൻ വനിതാ ടീമിന്റെ ക്യാപ്റ്റൻ റാണി റാംപാലും ഈ അവാർഡ് നേടിയിരുന്നു.

24 പേരാണ് നിലവിൽ അവാർഡിനായി മത്സരിക്കുന്നത്. ശ്രീജേഷിന് ഇതുവരെ ഒരു ലക്ഷത്തിൽ പരം വോട്ടുകൾ ലഭിച്ചപ്പോൾ രണ്ടാം സ്ഥാനത്തുള്ള സ്പെയിനിന്റെ ആൽബർട്ടോ ലോപസിനു അറുപത്തയ്യായിരം വോട്ടുകൾ മാത്രമേ ലഭിച്ചിട്ടുള്ളൂ. നിലവിലെ കണക്കുകൂട്ടലുകൾ അനുസരിച്ചു ശ്രീജേഷ് തന്നെ അവാർഡ് നേടും എന്നാണ് കരുതപ്പെടുന്നത്.

ശ്രീജേഷിന് വേണ്ടി ഈ ലിങ്കിൽ വോട്ട് രേഖപ്പെടുത്താം: http://bit.ly/3JVT8yV