കൊറോണ വൈറസ് ഭീഷണി വിഷയം ആവില്ല, ഓസ്‌ട്രേലിയൻ ഗ്രാന്റ് പ്രീ സമയത്ത് നടക്കും

കൊറോണ വൈറസ് ഭീഷണി വരാനിരിക്കുന്ന ഓസ്‌ട്രേലിയൻ ഗ്രാന്റ് പ്രീക്ക് വിഷയം ആവില്ലെന്ന് വ്യക്തമാക്കി അധികൃതർ. സമയത്ത് തന്നെ ഗ്രാന്റ് പ്രീ നടത്തും എന്നാണ് അധികൃതർ ഇപ്പോൾ പ്രഖ്യാപിച്ചത്. വരുന്ന മാർച്ച് 15 നാണ് സീസണിലെ ആദ്യ ഗ്രാന്റ് പ്രീ ആയ ഓസ്‌ട്രേലിയൻ ഗ്രാന്റ് പ്രീ നടക്കാൻ ഇരിക്കുന്നത്. അതിനാൽ തന്നെ റേസ് നടക്കുമോ എന്ന ആശങ്ക പല കോണിൽ നിന്ന് ഉണ്ടായിരുന്നു. മുമ്പ് ചൈനീസ് ഗ്രാന്റ് പ്രീ മാറ്റി വച്ചത് ആയി പ്രഖ്യാപനം വന്നിരുന്നു. അതോടൊപ്പം വിയറ്റ്‌നാം ഗ്രാന്റ് പ്രീയും സമയത്ത് നടക്കുമോ എന്ന സംശയം ഉണ്ട്.

കൊറോണ വൈറസ് ലോകത്ത് വലിയ ഭീഷണി ആയി പടരുകയാണ്. 3,000 ത്തിൽ അധികം ജീവൻ എടുത്ത വൈറസ് ലോകത്ത് ഏതാണ്ട് ഒരു ലക്ഷത്തിൽ അധികം ആളുകളെ ബാധിച്ചിട്ടുണ്ട്. നിലവിൽ ചൈനക്ക് പുറമെ, ഇറ്റലി, ജപ്പാൻ, ഇറാൻ എന്നീ രാജ്യങ്ങളിലെ സ്ഥിതി അത്ര നല്ലത് അല്ല. നിരവധി കാർ നിർമാതാക്കളും, എഞ്ചിൻ നിർമാതാക്കളും ഇറ്റലി, ജപ്പാൻ രാജ്യങ്ങളിൽ നിന്നുള്ളതിനാൽ ഫോർമുല വണ്ണിന്റെ മികച്ച നടത്തിപ്പിൽ വലിയ ആശങ്ക ആണ് നിലനിൽക്കുന്നത്. എന്നാൽ പുറത്ത് നിന്നുള്ളവരുടെ വരവിൽ വലിയ മുന്നൊരുക്കങ്ങളും പരിശോധനകളും ആണ് നിലവിൽ ഓസ്‌ട്രേലിയൻ അധികൃതർ നടത്തുന്നത്. ഓസ്‌ട്രേലിയയിൽ മെൽബണിലെ 25 മത്തെ ഗ്രാന്റ് പ്രീ ആണ് നടക്കാൻ ഇരിക്കുന്നത്.