ഇംഗ്ലീഷ് വനിതാ ഫുട്ബോളിലെ വലിയ ശക്തിയായ ചെൽസി ഒരിക്കൽ കൂടെ കോണ്ടിനെന്റൽ കപ്പ് സ്വന്തമാക്കി. ഇന്നലെ നടന്ന ഫൈനലിൽ ബ്രിസ്റ്റൽ സിറ്റിയെ തോൽപ്പിച്ചായിരുന്നു സിറ്റി കിരീടം ഉയർത്തിയത്. ഏകപക്ഷീയമായ മത്സരത്തിൽ എതിരില്ലാത്ത ആറു ഗോളുകൾക്കാണ് ചെൽസി വിജയിച്ചത്. ഓസ്ട്രേലിയൻ താരം സാം കെറിന്റെ ഹാട്രിക്ക് ആണ് ചെൽസിക്ക് കരുത്തേകിയത്‌.
മത്സരം തുടങ്ങി 90 സെക്കൻഡ് ആകുമ്പോൾ തന്നെ കെർ തന്റെ ആദ്യ ഗോൾ കണ്ടെത്തിയിരുന്നു. പത്താം മിനുട്ടിലും 48ആം മിനുട്ടിലുമായിരുന്നു കെറിന്റെ മറ്റു ഗോളുകൾ. ഈ ഗോളുകളോടെ കെറിന് ഈ സീസണിൽ 16 ഗോളുകൾ ആയി. ഫ്രാൻ കിർബി ചെൽസിക്കായി ഇരട്ട ഗോളുകളും നേടി. റൈറ്റൻ ആണ് മറ്റൊരു ഗോൾ നേടിയത്‌. നേരത്തെ കമ്മ്യൂണിറ്റി ഷീൽഡ് നേടിയ ചെൽസിയുടെ ഈ സീസണിലെ രണ്ടാം കിരീടമാണിത്.
