അണ്ടർ 15 സാഫ് കപ്പിൽ ഇന്ത്യ സെമിയിൽ വീണു. ഇന്ന് നടന്ന സെമി ഫൈനൽ മത്സരത്തിൽ ബംഗ്ലാദേശാണ് ഇന്ത്യയെ തോൽപ്പിച്ച് ഫൈനലിലേക്ക് കടന്നത്. പെനാൾട്ടി ഷൂട്ടൗട്ടിലായിരുന്നു ബംഗ്ലാദേശിന്റെ വിജയം. കളിയുടെ 93ആം മിനുട്ട് വരെ ഒരു ഗോളിന് ഇന്ത്യ മുന്നിട്ട് നിന്നതായിരുന്നു. എന്നാൽ ഇഞ്ച്വറി ടൈമിന്റെ അവസാന നിമിഷത്തിൽ പിറന്ന ഒരു പെനാൾട്ടി കളി മാറ്റി.
പെനാൾട്ടി ലഭിച്ച ബംഗ്ലാദേശ് ലക്ഷ്യം കാണുകയും മത്സരം പെനാൽറ്റി ഷൂട്ടൗട്ടിലേക്ക് എത്തിക്കുകയുമായിരുന്നു. ഷൂട്ടൗട്ടിൽ ഇന്ത്യ രണ്ട് പെനാൾട്ടികൾ നഷ്ടപ്പെടുത്തി. കളിയുടെ 17ആം മിനുട്ടിൽ പീറ്റ ഹർഷ് ആണ് ഇന്ത്യയുടെ ഗോൾ നേടിയിരുന്നത്. നിലവിലെ ചാമ്പ്യന്മാരായ ഇന്ത്യക്ക് ഈ തോൽവി വലിയ തിരിച്ചടിയാണ്. ഗ്രൂപ്പ് ഘട്ടത്തിൽ ഇന്ത്യ പാകിസ്ഥാനോടും പരാജയപ്പെട്ടിരുന്നു. ഇനി മൂന്നാം സ്ഥാന മത്സരത്തിൽ ഇന്ത്യ കളിക്കും.
