പി എസ് ജിയുടെ സെന്റർ ബാക്കായിരുന്ന സെർജിയോ റാമോസ് സൗസിയിലേക്ക് തന്നെ പോകാൻ സാധ്യത. റാമോസിനെ സ്വന്തമാക്കാനുള്ള ശ്രമം സൗസി ക്ലബായ അൽ ഇത്തിഹാദ് ആരംഭിച്ചിരിക്കുകയാണ്. റാമോസിന് മുന്നിൽ രണ്ട് വർഷത്തെ കരാർ അൽ ഇത്തിഹാദ് വെച്ചിട്ടുണ്ട്. ഈ ട്രാൻസ്ഫർ നടന്നാൽ ബെൻസീമയും റാമോസും വീണ്ടും ഒരുമിക്കുന്നത് കാണാൻ ആകും.
റാമോസിന് 10 മില്യൺ വാർഷിക വരുമാനം ലഭിക്കുന്ന ഒരു കരാർ തുർക്കി ക്ലബായ ഗലറ്റസറെയും വാഗ്ദാനം ചെയ്തിട്ടുണ്ട്. അടുത്ത ദിവസങ്ങളിൽ തന്നെ റാമോസ് തന്റെ അവസാന തീരുമാനം ഗലറ്റസറെയെ അറിയിക്കും.
റാമോസ് ഇപ്പോഴും ഫ്രീ ഏജന്റായി തുടരുകയാണ്. പി എസ് ജിയിൽ ആയിരുന്നു റാമോസ് അവസാന രണ്ട് സീസണിൽ കളിച്ചിരുന്നത്‌. പരിക്കിന്റെ പ്രശ്‌നങ്ങൾ കാരണം വെല്ലുവിളി നിറഞ്ഞ ആദ്യ സീസൺ ആയിരുന്നു റാമോസിന് പി എസ് ജിയിൽ നേരിടേണ്ടി വന്നത്. എന്നാൽ രണ്ടാം സീസണിൽ ഫിറ്റ്നസ് വീണ്ടെടുത്ത റാമോസ് പി എസ് ജി നിരയിലെ സ്ഥിരം സാന്നിദ്ധ്യമായി. റാമോസിന്റെ പ്രകടനങ്ങൾ താരത്തിന് വലിയ ആരാധക പിന്തുണയും നൽകി. റാമോസിനെ നിലനിർത്താൻ പി എസ് ജി ശ്രമിച്ചിരുന്നു എങ്കിലും താരം ക്ലബിൽ തുടരാൻ താല്പര്യപ്പെട്ടില്ല.
