പി‌എസ്‌ജി വിട്ട ഡിഫൻഡർ സെർജിയോ റാമോസ് തന്റെ ഭാവി ഇനിയും തീരുമാനിച്ചിട്ടില്ല. റാമോസിമായി ഇന്റർ മയാമി രംഗത്ത് ഉള്ളതായി ഫബ്രിസിയോ റൊമാനോ റിപ്പോർട്ട് ചെയ്യുന്നു. മെസ്സിയെ സ്വന്തമാക്കിയ ഇന്റർ മയാമി റാമോസുമായി ചർച്ചകൾ ആരംഭിച്ചിട്ടുണ്ട്. മയാമിയിൽ നിന്ന് മാത്രമല്ല സൗദിയിൽ നിന്നും റാമോസിന് ഓഫറുകൾ ഉണ്ട്.
റാമോസ് തന്റെ കുടുംബവുമായി ആലോചിച്ച് ആകും എവിടേക്ക് പോകും എന്ന് തീരുമാനിക്കുക. അൽ നസർ റാമോസിനായി നേരത്തെ തന്നെ രംഗത്ത് ഉണ്ടായിരുന്നു. അൽ നസറിനെ കൂടാതെ സൗദിയിലെ ഒരു ടോപ് 4 ക്ലബ് കൂടെ റാമോസിനായി രംഗത്ത് ഉണ്ട്. എങ്കിലും ഇന്റർ മയാമി ആണ് ഇപ്പോൾ റാമോസിനായുള്ള പോരാട്ടത്തിൽ മുന്നിൽ ഉള്ളത്. അവർ ഇതിനകം മെസ്സിക്ക് ഒപ്പം ബുസ്കറ്റ്സിനെയും ആൽബയെയും ടീമിലേക്ക് എത്തിച്ചിട്ടുണ്ട്.
പി എസ് ജിയിൽ ആയിരുന്നു റാമോസ് അവസാന രണ്ട് സീസണിൽ കളിച്ചിരുന്നത്‌. പരിക്കിന്റെ പ്രശ്‌നങ്ങൾ കാരണം വെല്ലുവിളി നിറഞ്ഞ ആദ്യ സീസൺ ആയിരുന്നു റാമോസിന് പി എസ് ജിയിൽ നേരിടേണ്ടി വന്നത്. എന്നാൽ രണ്ടാം സീസണിൽ ഫിറ്റ്നസ് വീണ്ടെടുത്ത റാമോസ് പി എസ് ജി നിരയിലെ സ്ഥിരം സാന്നിദ്ധ്യമായി. റാമോസിന്റെ പ്രകടനങ്ങൾ താരത്തിന് വലിയ ആരാധക പിന്തുണയും നൽകി. റാമോസിനെ നിലനിർത്താൻ പി എസ് ജി ശ്രമിച്ചിരുന്നു എങ്കിലും താരം ക്ലബിൽ തുടരാൻ താല്പര്യപ്പെട്ടില്ല.
