ബയേൺ മ്യൂണിക്കിന്റെ ഫുൾബാക്കായിരുന്ന റഫീന ഇനി ബ്രസീലിൽ കളിക്കും. ബ്രസീലിലെ വൻ ക്ലബായ ഫ്ലമെംഗോയുമായി താരം കരാറിൽ എത്തി. അവസാന എട്ടു വർഷമായി ബയേണിൽ കളിക്കുന്ന താരം ഈ സീസണോടെ ക്ലബ് വിടുമെന്ന് നേരത്തെ തന്നെ അറിയിച്ചിരുന്നു. ബയേണൊപ്പം നിരവധി കിരീടങ്ങൾ നേടിയ റഫീന ബയേൺ കണ്ട മികച്ച റൈറ്റ് ബാക്കുകളിൽ ഒന്നുമാണ്.
18 ക്ലബ് കിരീടങ്ങൾ റഫീന ബയേണ് ഒപ്പം നേടിയിട്ടുണ്ട്. ഇതിൽ ഏഴു ബുണ്ടസ് ലീഗ കിരീടവും ഒരു ചാമ്പ്യൻസ് ലീഗ് കിരീടവും ഉൾപ്പെടുന്നു. ബ്രസീലിയൻ സ്വദേശിയായ റഫീനയുടെ ബ്രസീലിലേക്കുള്ള മടക്കം കൂടിയാണ് ഇത്. മുമ്പ് ബ്രസീലിയൻ ക്ലബായ കോറിറ്റിബയിൽ ആയിരുന്നു റഫീന കളിച്ചത്. ബ്രസീലിയൻ ലീഗിൽ കുറച്ച് വർഷങ്ങൾ കളിച്ചതിനു ശേഷം വിരമിക്കാനാണ് റഫീന ഉദ്ദേശിക്കുന്നത്.
