സുഡാനിൽ ജനനം, അവിടുന്ന് ഈജിപ്തിലേക്ക്, പിന്നീട് അഭയാർത്ഥിയായി ഓസ്‌ട്രേലിയൻ മണ്ണിലേക്ക്. ജന്മനാട് വിട്ട് മറ്റിടങ്ങളിലേക്ക് ചേക്കേറുമ്പോഴും കൗൾ കുടുംബത്തിലെ സന്താനങ്ങൾ പന്ത് കളി മറന്നിരുന്നില്ല. മൂത്തവൻ അലു കൗൾ സ്റ്റുഗർട്ടിലേക്കാണ് ചേക്കേറിയതെങ്കിൽ പിടിച്ചതിനെക്കാൾ വലുത് മാളത്തിൽ എന്ന കണക്കിൽ ആണ് താരത്തിന്റെ സഹോദരൻ ഗരങ് കൗൾ. 2021ൽ മാത്രം ഓസ്‌ട്രേലിയൻ എ-ലീഗിൽ അരങ്ങേറിയ താരത്തെ റാഞ്ചിയിരിക്കുന്നത് ന്യൂകാസിൽ ആണ്. പതിനെട്ടുകാരൻ ജനുവരിയിൽ ഇംഗ്ലീഷ് മണ്ണിൽ കാലുകുത്തും.
ആദ്യം സെൻട്രൽ കോസ്റ്റ് മറൈനേഴ്‌സ് ടീമിന്റെ യൂത്ത് ടീമിലും പിന്നീട് സീനിയർ ടീമിലും അരങ്ങേറിയ താരം പത്തോളം മത്സരങ്ങൾ മാത്രമേ സീനിയർ തലത്തിൽ കളിച്ചിട്ടുള്ളു. കഴിഞ്ഞ വാരം ഓസ്‌ട്രേലിയൻ ദേശിയ ടീമിന് വേണ്ടിയും അരങ്ങേറി. മെയ് മാസം ബാഴ്‌സക്കെതിരെ കളത്തിൽ ഇറങ്ങിയ എ-ലീഗ് ഓൾ സ്റ്റാർ ഇലവനിലും താരം ഉൾപ്പെട്ടിരുന്നു.
“ഇത് അവിശ്വസനീയമാണ്” ഗരങ് പറഞ്ഞു, “മറ്റെല്ലാവരെയും പോലെ പ്രീമിയർ ലീഗ് തന്നെ ആയിരുന്നു പ്രധാനമായും കണ്ടിരുന്നത്. എന്നാൽ ആ ഉയരത്തിൽ എത്താൻ സാധിക്കുമെന്ന് ഒരിക്കലും കരുതിയില്ല.” ന്യൂകാസിൽ തരമായതോടെ താൻ കൂടുതൽ കഠിനാധ്വാനം ചെയ്യണമെന്നും, ലോകകപ്പിന് ശേഷം ഇങ്ങോട് മടങ്ങി വരുമെന്നും ടീമിനോടൊപ്പം, കരാർ ഒപ്പിട്ടുകൊണ്ട് താരം പറഞ്ഞു.
