യുവന്റസിന്റെ അമേരിക്കൻ താരം വെസ്റ്റൻ മക്കെന്നിയെ എത്തിക്കാൻ ലീഡ്സിന്റെ നീക്കം. ലീഗിൽ റിലെഗെഷൻ സോണിന് തൊട്ടു മുകളിൽ നിൽക്കുന്ന ലീഡ്സ് മധ്യനിരക്ക് കരുത്തേകുന്നതിന് വേണ്ടി താരത്തെ എത്തിക്കാൻ താൽപ്പര്യപ്പെടുന്നതായി ഡി മാർസിയോ റിപ്പോർട്ട് ചെയ്യുന്നു. ടീമുകൾ ആദ്യ ഘട്ട ചർച്ച നടത്തിയതായി ഇംഗ്ലീഷ് മാധ്യമങ്ങൾ സൂചിപ്പിച്ചു. ട്രാൻസ്ഫർ വിൻഡോ അവസാനത്തോട് അടുക്കാറായതോടെ നീക്കങ്ങൾ വേഗത്തിലായേക്കും.
അതേ സമയം മൊറോക്കോയുടെ ലോകക്കപ്പ് ടീമിലെ താരമായ അസദീൻ ഓനാഹിയെയും ലീഡ്സ് നോട്ടമിട്ടിട്ടുണ്ട്. താരത്തിന് വേണ്ടി നേരത്തെ ലീഡ്സ് ഓഫർ സമർപ്പിച്ചിട്ടുമുണ്ട്. എന്നാൽ പിന്നീട് നീക്കുപോക്കുകൾ ഒന്നും ആയിട്ടില്ല. മക്കെന്നി ആവട്ടെ യുവന്റസ് ഒഴിവാക്കാൻ ഉദ്ദേശിക്കുന്ന താരങ്ങളിൽ ഒരാളാണ്. ഷാൽക്കെയിൽ നിന്ന് എത്തിയ ശേഷം പ്രതീക്ഷിച്ച പ്രകടനം പുറത്തെടുക്കാൻ താരത്തിന് സാധിച്ചിരുന്നില്ല. അമേരിക്കകാരൻ തന്നെയായ കോച്ച് ജെസ്സെ മാർഷിന്റെ ലീഡ്സിലെ സാന്നിധ്യവും മക്കെന്നിയുടെ തീരുമാനത്തെ സ്വാധീനിച്ചേക്കും.
