എ സി മിലാന് വൻ വിജയം. ഇന്നലെ ടൊറീനോയെ നേരിട്ട മിലാൻ ഒരു ദയയും കാണിക്കാത്ത പ്രകടനമാണ് കാഴ്ചവെച്ചത്. പിയോളിയുടെ ടീം എതിരില്ലാത്ത ഏഴു ഗോളുകളുടെ വിജയമാണ് ഇന്നലെ നേടിയത്. ടൂറിനിൽ വെച്ചായിരുന്നു മത്സരം നടന്നത്. എ സി മിലാനു വേണ്ടി റെബിക് ഹാട്രിക്ക് നേടി. 67, 72, 79 മിനുട്ടുകളിൽ ആയിരുന്നു റെബികിന്റെ ഗോളുകൾ. താരത്തിന്റെ എ സി മിലാൻ കരിയറിലെ ആദ്യ ഹാട്രിക്കായിരുന്നു ഇത്.
ആദ്യ പകുതിയിൽ തിയോ ഹെർണാണ്ടസും കെസ്സിയും നേടിയ ഗോളുകളിൽ എ സി മിലാൻ രണ്ടു ഗോളുകൾക്ക് മുന്നിൽ എത്തിയിരുന്നു. രണ്ടാം പകുതിയിൽ ബ്രഹിം ഡിയസും പിന്നാലെ വീണ്ടും തിയോ ഹെർണാണ്ടസും ഗോൾ നേടി. അതിനു ശേഷമായിരുന്നു റെബികിന്റെ ഹാട്രിക്ക്. ഈ വിജയം മിലാനെ 75 പോയിന്റുമായി മൂന്നാമത് എത്തിച്ചു. ഇനി ലീഗിൽ രണ്ടു മത്സരങ്ങൾ മാത്രമെ ശേഷിക്കുന്നുള്ളൂ.
