തന്ത്രങ്ങൾ ഓതാൻ ഇൻസാഗി തന്നെ; ഇന്ററിൽ പുതിയ കരാർ ഒപ്പിട്ടു

സിമോണെ ഇൻസാഗിയുമായി പുതിയ കരാറിൽ ഒപ്പിട്ട് ഇന്റർ മിലാൻ. നിലവിലെ കരാർ അടുത്ത വർഷത്തോടെ അവസാനിക്കാൻ ഇരിക്കെ, പുതിയ കരാർ പ്രകാരം 2025 വരെ ടീമിൽ തുടരാൻ കോച്ചിനാവും. നേരത്തെ ആന്റണിയോ കൊന്റെക്ക് പകരക്കാരനായാണ് ഇൻസാഗി ഇന്റർ മിലാനിൽ എത്തുന്നത്. ഇനിസാഗിയുടെ സേവനം നീട്ടി നൽകുന്നതിൽ ആഹ്ലാദം ഇന്റേത് മിലാൻ ഔദ്യോഗിക കുറിപ്പിൽ അറിയിച്ചു.

ചുരുങ്ങിയ കാലത്തിനുള്ളിൽ ഇന്ററിൽ നേട്ടങ്ങൾ കൊയ്യാൻ ഇൻസാഗിക്ക് സാധിച്ചിരുന്നു. രണ്ടു കോപ്പ ഇറ്റാലിയയും രണ്ടു സൂപ്പർ കപ്പും കരസ്ഥമാക്കി. ചാമ്പ്യൻസ് ലീഗ് ഫൈനലിൽ എത്താനും സാധിച്ചു. ഇത്തവണ ലീഗിൽ മികച്ച തുടക്കം കുറിച്ച ഇന്റർ, മൂന്നിൽ മൂന്നു വിജയവും ആയി ഗോൾ വ്യത്യാസത്തിൽ നഗരവൈരികൾ ആയ എസി മിലാനെ മറികടന്ന് ഒന്നാം സ്ഥാനത്താണ് നിലവിൽ ഉള്ളത്. ഇതുവരെ ഗോളുകൾ ഒന്നും വഴങ്ങിയിട്ടും ഇല്ല. കഴിഞ്ഞ സീസണിന്റെ തുടർച്ച എന്നവണ്ണം ഗംഭീര പ്രകടനം തന്നെയാണ് ഇന്റർ ഉന്നമിടുന്നത്. കൂടുമാറിയ പ്രമുഖ താരങ്ങൾക്ക് മികച്ച പകരക്കാരെ എത്തിച്ച് ടീമിനെ കൂടുതൽ ശക്തിപ്പെടുത്താൻ അവർക്കായി. കൂടാതെ ഇൻസാഗിയുടെ തന്ത്രങ്ങൾ കൂടി ആവുമ്പോൾ യൂറോപ്പിലും ആഭ്യന്തര ലീഗിലും മികച്ച പ്രകടനം തന്നെ അവർ പ്രതീക്ഷിക്കുന്നു.