ഇബ്രാഹിമോവിച് വന്നതോടെ ഊർജ്ജം തിരിച്ചു കിട്ടിയ എ സി മിലാൻ അവരുടെ അപരാജിത കുതിപ്പ് തുടരുന്നു. ഇന്നലെ ടൊറീനോയെ കോപ ഇറ്റാലിയ ക്വാർട്ടറിൽ നേരിട്ട എ സി മിലാൻ എക്സ്ട്രാ ടൈം വരെ നീണ്ട പോരാട്ടത്തിനൊടുവിൽ വിജയം കണ്ടെത്തി. രണ്ടിനെതിരെ നാലു ഗോളുകൾക്കായിരുന്നു മിലാന്റെ വിജയം. ഇരട്ട ഗോളുകളുമായി ചാഹനൊംഗ്ലു ആണ് വിജയ ശില്പിയായത്.
നിശ്ചിത സമയത്ത് മത്സരം 2-2 എന്ന നിലയിൽ ആയിരുന്നു. ഇഞ്ച്വറി ടൈമിൽ ചാഹനൊംഗ്ലു നേടിയ ഗോളാണ് എ സി മിലാനെ ഫുൾ ടൈം വിസിലിന് മുമ്പ് 2-2 എന്ന സ്കോറിൽ എത്തിച്ചത്. എക്സ്ട്രാ ടൈമിൽ ഇബ്രാഹിമോവിചും മിലാനുവേണ്ടി ഗോൾ നേടി. ഇബ്ര മിലാനിൽ എത്തിയ ശേഷം ഒരു മത്സരം പോലും മിലാൻ തോറ്റിട്ടില്ല. ഇനി സെമിയിൽ യുവന്റസിനെ ആകും മിലാൻ നേരിടുക. ഇരു പാദങ്ങളായി നടക്കുന്ന മത്സരം ഫെബ്രുവരി 12, മാർച്ച് 4 എന്നീ തീയതികളിൽ ആകും നടക്കുക. ക്രിസ്റ്റ്യാനോ റൊണാൾഡോ ഇബ്രാഹിമോവിച് പോരാട്ടം ആകും ഇത് എന്നത് ഫുട്ബോൾ ആരാധകരെ ആവേശത്തിലാക്കും.
