സന്തോഷ് ട്രോഫി ഫൈനൽ റൗണ്ടിലെ അവസാന ഗ്രൂപ്പ് ഘട്ട മത്സരത്തിൽ കേരളം ഇന്ന് പഞ്ചാബിനെ നേരിടും. ഇന്ന് വിജയിച്ചാൽ മാത്രമേ കേരളത്തിന് സെമി ഫൈനൽ പ്രതീക്ഷയുള്ളൂ. നാലു ഗ്രൂപ്പ് മത്സരങ്ങൾ കഴിഞ്ഞപ്പോൾ 7 പോയിന്റുമായി കേരളം മൂന്നാം സ്ഥാനത്താണ് നിൽക്കുന്നത്. 10 പോയിന്റുമായി പഞ്ചാബ് ഒന്നാം സ്ഥാനത്തും 8 പോയിന്റുമായി കർണാടക രണ്ടാം സ്ഥാനത്തും നിൽക്കുന്നു. ആദ്യ രണ്ടു സ്ഥാനങ്ങളിൽ എത്തിയാൽ മാത്രമേ സെമി ഉറപ്പിക്കാൻ ആകു.
ഇന്ന് ജയിച്ചാൽ ഹെഡ് ഡു ഹെഡിന്റെ ബലത്തിൽ കേരളത്തിന് പഞ്ചാബിനെ മറികടക്കാൻ ആകും. എന്നാൽ മികച്ച ഫോമിലുള്ള പഞ്ചാബിനെ തോൽപ്പിക്കുക കേരളത്തിന് എളുപ്പമാകില്ല. കേരളം ഇതുവരെ നല്ല ഫോമിലേക്ക് ഉയർന്നു എന്ന് പറയാൻ ആകില്ല. ആരാധകരും കേരളത്തിൽ നിന്ന് ഏറെ മെച്ചപ്പെട്ട പ്രകടനം പ്രതീക്ഷിക്കുന്നുണ്ട്. ഇന്ന് വൈകിട്ട് 3 മണിക്ക് നടക്കുന്ന മത്സരം ഇന്ത്യൻ ഫുട്ബോളിന്റെ ഫേസ് ബുക്ക് പേജ് വഴി തത്സമയം കാണാൻ ആകും.
