ലിവർപൂളിനെതിരായ മത്സരത്തിൽ ചുവപ്പ് കാർഡ് കണ്ട് പുറത്തുപോയപ്പോൾ മോശമായി പെരുമാറിയതിന് ടോട്ടനം ക്യാപ്റ്റൻ ക്രിസ്റ്റ്യൻ റൊമേറോയ്ക്കെതിരെ ഇംഗ്ലീഷ് ഫുട്ബോൾ അസോസിയേഷൻ (FA) അച്ചടക്ക നടപടി സ്വീകരിച്ചു. ലിവർപൂളിനോട് 2-1 ന് തോറ്റ മത്സരത്തിന്റെ 93-ാം മിനിറ്റിലാണ് ഇബ്രാഹിമ കൊണാട്ടെയെ വീഴ്ത്തിയതിന് റൊമേറോ രണ്ടാം മഞ്ഞക്കാർഡും തുടർന്ന് ചുവപ്പ് കാർഡും കണ്ട് പുറത്തായത്.
എന്നാൽ റെഫറി ജോൺ ബ്രൂക്സിന്റെ തീരുമാനത്തിൽ പ്രകോപിതനായ താരം മൈതാനം വിടാൻ വൈകിച്ചുവെന്നും റെഫറിയോട് ആക്രമണോത്സുകമായി പെരുമാറിയെന്നുമാണ് എഫ്എയുടെ കണ്ടെത്തൽ. ജനുവരി രണ്ടിനകം റൊമേറോ ഇതിന് മറുപടി നൽകേണ്ടതുണ്ട്.
നിലവിൽ സസ്പെൻഷൻ കാരണം ഞായറാഴ്ച ക്രിസ്റ്റൽ പാലസിനെതിരെ റൊമേറോയ്ക്ക് കളിക്കാൻ കഴിയില്ല.
എന്നാൽ എഫ്എയുടെ പുതിയ ചാർജ് കൂടി പരിഗണിച്ചാൽ താരത്തിന് മൂന്നോ അതിലധികമോ മത്സരങ്ങളിൽ അധിക വിലക്ക് ലഭിക്കാൻ സാധ്യതയുണ്ട്. ഇത് ബ്രെന്റ്ഫോർഡ്, സണ്ടർലാൻഡ് തുടങ്ങിയ ടീമുകൾക്കെതിരായ വരാനിരിക്കുന്ന പ്രധാന മത്സരങ്ങളിൽ ടോട്ടനത്തിന് വലിയ തിരിച്ചടിയാകും. നേരത്തെ സാവി സിമൺസും ചുവപ്പ് കാർഡ് കണ്ട് പുറത്തായതോടെ ഒൻപത് പേരുമായാണ് ടോട്ടനം മത്സരം പൂർത്തിയാക്കിയത്.
