സീരി എ ക്ലബ്ബായ കോമോ, റയൽ മാഡ്രിഡിൽ നിന്നും യുവ പ്രതിരോധ താരം ജാക്കോബോ റാമോണുമായി സ്ഥിരം കരാറിലെത്തി. റയൽ മാഡ്രിഡിന്റെ കാസ്റ്റില്ല അക്കാദമിയിലൂടെ വളർന്നുവന്ന 19-കാരനായ താരം, 2025-26 സീസണിന് മുന്നോടിയായി ഫാബ്രിഗസിന്റെ ടീമിനൊപ്പം ചേരും.
റിപ്പോർട്ടുകൾ പ്രകാരം, 2.5 മില്യൺ യൂറോയുടെ ഈ കരാർ, നേരത്തെ നിക്കോ പാസിനെ സ്വന്തമാക്കിയ അതേ മാതൃകയിലാണ്. കോമോക്ക് താരത്തിന്റെ പൂർണ്ണ ഉടമസ്ഥാവകാശം ലഭിക്കുമെങ്കിലും, റയൽ മാഡ്രിഡ് ചില പ്രധാന വ്യവസ്ഥകൾ കരാറിൽ ഉൾപ്പെടുത്തിയിട്ടുണ്ട്. ഭാവിയിൽ താരത്തെ തിരികെ ടീമിലെത്തിക്കാനുള്ള ബൈ-ബാക്ക് ഓപ്ഷനുകളും, ഭാവിയിൽ റാമോണിനെ വിൽക്കുകയാണെങ്കിൽ അതിന്റെ 50% ലാഭം റയൽ മാഡ്രിഡിന് ലഭിക്കുമെന്ന വ്യവസ്ഥയും ഇതിൽ ഉൾപ്പെടുന്നു.
