രാജ്യാന്തര മത്സരങ്ങൾക്കായുള്ള ഇടവേളക്ക് ശേഷം ഇംഗ്ലീഷ് പ്രീമിയർ ലീഗ് വീണ്ടും തുടങ്ങുമ്പോൾ മാഞ്ചസ്റ്റർ സിറ്റിക്ക് ഇന്ന് കളി വെസ്റ്റ് ഹാമിനെതിരെ. വെസ്റ്റ് ഹാമിന്റെ മൈതാനമായ ലണ്ടൻ സ്റ്റേഡിയത്തിൽ ഇന്ന് ഇന്ത്യൻ സമയം രാത്രി 8.30 നാണ് മത്സരം കിക്കോഫ്.
മുൻ മാഞ്ചസ്റ്റർ സിറ്റി പരിശീലകൻ മാനുവൽ പല്ലേഗ്രിനിക്ക് ഇന്ന് തന്റെ മുൻ ടീമുമായുള്ള ആദ്യ മത്സരമാണ്. സീസണിന്റെ തുടക്കത്തിൽ ഫോമില്ലതെ വിഷമിച്ച വെസ്റ്റ് ഹാം പക്ഷെ സമീപ കളികളിൽ താരതമ്യേന മികച്ച കളിയാണ് പുറത്തെടുക്കുന്നത്. എങ്കിലും അപരാജിതരായി കുതിക്കുന്ന സിറ്റിയെ മറികടക്കാൻ അവർക്ക് മികച്ച കളി തന്നെ പുറത്ത് എടുക്കേണ്ടി വരും.
സസ്‌പെൻഷൻ മാറി വെസ്റ്റ് ഹാം ക്യാപ്റ്റൻ മാർക്ക് നോബിൾ തിരിച്ചെത്തും. പക്ഷെ അഞ്ചാം മഞ്ഞകാർഡ് കണ്ട റോബർട്ട് സ്നോഡ്ഗ്രാസ് ഇന്ന് പുറത്തിരിക്കേണ്ടി വരും. പരിക്ക് മാറി എത്തിയ സ്‌ട്രൈക്കർ ആൻഡി കരോൾ ഇന്ന് പകരക്കാരുടെ ബെഞ്ചിൽ ഉണ്ടാകും. സിറ്റി നിരയിൽ ബെർനാടോ സിൽവക്ക് നേരിയ പരിക്കുണ്ട്. കൂടാതെ ലെഫ്റ്റ് ബാക്ക് ബെഞ്ചമിൻ മെൻഡി 3 മാസത്തോളം പുറത്താണ്.
