ഇംഗ്ലീഷ് പ്രീമിയർ ലീഗിൽ ഇന്ന് നടക്കുന്ന വമ്പൻ പോരാട്ടത്തിൽ മാഞ്ചസ്റ്റർ യുണൈറ്റഡ് ടോട്ടനത്തെ നേരിടും. ഇന്ന് ലണ്ടണിൽ നടക്കുന്ന മത്സരം രാത്രി 10 മണിക്കാണ് നടക്കുക. കളി തത്സമയം സ്റ്റാർ സ്പോർട്സിലും ഹോട്സ്റ്റാറിലും കാണാം. മാഞ്ചസ്റ്റർ യുണൈറ്റഡ് വിജയത്തോടെ ആണ് സീസൺ ആരംഭിച്ചു എങ്കിലും വോൾവ്സിന് എതിരായ ആദ്യ മത്സരം യുണൈറ്റഡിന് അത്ര തൃപ്തി നൽകുന്നത് ആയിരുന്നില്ല. കഷ്ടിച്ചു വിജയിച്ചു എന്ന് പറയാം.
സ്പർസിന് ആദ്യ മത്സരം വിജയിക്കാനേ ആയിരുന്നില്ല. പുതിയ പരിശീലകന് കീഴിൽ അത്യാവശ്യം നല്ല തുടക്കം ആണെങ്കിലും ഹാരി കെയ്നിന്റെ അഭാവം സ്പർസ് എങ്ങനെ നികത്തും എന്ന് കണ്ടറിയണം. പുതിയ സൈനിംഗ് മാഡിസണും സോണും റിച്ചാർലിസണും ആകും സ്പർസിന്റെ അറ്റാക്കിനെ ഇന്ന് നയിക്കുന്നത്.
മാഞ്ചസ്റ്റർ യുണൈറ്റഡിന് ഇന്നും പുതിയ സ്ട്രൈക്കർ റാസ്മസ് ഹൊയ്ലുണ്ടിന്റെ സേവനം നഷ്ടമാകും. കഴിഞ്ഞ മത്സരത്തിൽ പരിക്കേറ്റിരുന്ന ലിസാൻഡ്രോ മാർട്ടിനസ് പരിക്ക് മാറി ഇന്നലെ പരിശീലനം നടത്തിയിരുന്നു. വരാനെയും ലിസാൻഡ്രോയും തന്നെ സെന്റർ ബാക്ക് കൂട്ടുകെട്ടിൽ ഇറങ്ങാൻ ആണ് സാധ്യത.
