ഇന്ന് ന്യൂകാസിൽ യുണൈറ്റഡിനോട് പരാജയപ്പെട്ട ഷെഫീൽഡ് യുണൈറ്റഡ് പ്രീമിയർ ലീഗിൽ നിന്ന് റിലഗേറ്റ് ആയി. ഇന്ന് സെൻറ് ജെയിംസ് പാർക്കിൽ വച്ച് നടന്ന മത്സരത്തിൽ ഒന്നിനെതിരെ അഞ്ചു ഗോളുകളുടെ വലിയ പരാജയമാണ് ഷെഫീൽഡ് യുണൈറ്റഡ് വഴങ്ങിയത്. ഇതോടെ അവർ ലീഗിൽ നിന്ന് തരംതാഴ്ത്തപ്പെടുമെന്ന് ഉറപ്പായി. ഇന്ന് തുടക്കത്തിൽ ഒരു ഗോൾ ലീഡ് എടുത്ത ശേഷം ആയിരുന്നു ഷെഫീൽഡ് പരാജയത്തിലേക്ക് വീണത്.
അഞ്ചാം മിനിറ്റിൽ അഹ്മദോവിചിന്റെ ഗോളിൽ ആയിരുന്നു അവർ ലീഡ് എടുത്തത്. 26ആം മിനിറ്റിൽ ഇസാക്കിലൂടെ ന്യൂകാസിൽ സമനില പിടിച്ചു. ആദ്യപകുതിയിൽ ഉടനീളം ഈ സമനില തുടർന്നു. രണ്ടാം പകുതിയിൽ 54ആം മിനിറ്റിൽ ബ്രൂണോയുടെ ഗോളിൽ അവർ ലീഡ് എടുത്തു. 61ആം മിനിറ്റിൽ ഒരു പെനാൽറ്റിയിലൂടെ ഇസാക്ക് വീണ്ടും ന്യൂകാസിലിനായി ഗോൾ നേടി.
ഇതിനു പിന്നാലെ ഒരു സെൽഫ് ഗോളും ന്യൂകാസിലിന് ലഭിച്ചു. 72ആം മിനുട്ടിൽ കാലം വിൽസൺ കൂടെ ഗോൾ നേടിയതോടെ വിജയം പൂർത്തിയായി. ഈ വിജയത്തോടെ ന്യൂകാസിൽ 53 പോയിന്റുമായി ഏഴാം സ്ഥാനത്ത് നിൽക്കുകയാണ്. ഷെഫീൽഡ് 16 പോയിന്റുമായി ഇരുപതാം സ്ഥാനത്ത് തന്നെ ഫിനിഷ് ചെയ്യുമെന്ന് ഉറപ്പായി. ഈ സീസണൽ ആകെ മൂന്നു മത്സരങ്ങൾ മാത്രമാണ് അവർ വിജയിച്ചത്.
