മിക്കി : ആർസനലിന്റെ പുതിയ നമ്പർ 7!

അലക്സിസ് സാഞ്ചസ് താര കൈമാറ്റത്തിലൂടെ ആർസനലിലെത്തിയ ഹെൻറിക് മിക്കിത്താര്യന്റെ നമ്പർ സംബന്ധിച്ച സംശയങ്ങൾക്ക് ഒടുവിൽ അവസാനം. ആർസനലിൽ അലക്സിസ് സാഞ്ചസ് ഒഴിച്ച് പോകുന്ന നമ്പർ 7 ജെർസ്സി നമ്പർ തന്നെയാവും മിക്കിയും ആർസനലിൽ അണിയുക. ഇന്നലെ മിക്കി ആർസനലിലെത്തിയെങ്കിലും ഇന്നാണ് ആർസനൽ മിക്കി ഏത് നമ്പർ അണിയുമെന്ന് പുറത്ത് വിട്ടത്. മിക്കിക്ക് പകരം യുണൈറ്റഡിൽ എത്തിയ സാഞ്ചസും 7 നമ്പറാണ് അണിയുക എന്ന് യുണൈറ്റഡ് ഇന്നലെയെ അറിയിച്ചിരുന്നു.

ജനുവരി ട്രാൻസ്ഫർ കാലത്ത് തന്നെ ഡോർട്ട്മുണ്ട് താരം ഔബമയാങ് ടീമിലെത്തുമെന്ന് പ്രതീക്ഷിക്കുന്ന ആർസനൽ ആരാധകർ മിക്കിയുടെ നമ്പർ ഇന്നലെ വെളിപ്പെടുത്താതതിൽ സംശയങ്ങൾ പ്രകടിപ്പിച്ചിരുന്നു. വാൾകോട്ട് എവർട്ടണിലേക്ക് പോയതോടെ അനാഥമായ 14 നമ്പർ ജെർസി ആരണിയും എന്നതിനെ പറ്റിയായിരുന്നു ആ സംശയങ്ങൾ. ഹെൻറി ആർസനലിൽ അനശ്വരമാക്കിയ 14 നമ്പറിനായി അമബയോഗ് എത്തുമെന്ന് തന്നെയാണ് ആർസനൽ ആരാധകരുടെ പ്രതീക്ഷ. നമ്പർ 7 ലഭിച്ചുവെങ്കിലും യുഫേഫ നിയമങ്ങൾ കാരണം മിക്കിക്ക് യൂറോപ്പ ലീഗിൽ വേറെ ജെർസി നമ്പർ അണിയേണ്ടി വരും. യൂറോപ്പ ലീഗിൽ ഈ സീസണിൽ നമ്പർ 7 ജെർസി അണിഞ്ഞ് സാഞ്ചസ് ആർസനലിനായി കളിച്ചതിനാലാണിത്. റോബർട്ട് പിറസ് അടക്കം ആർസനലിന്റെ ഇതിഹാസ താരങ്ങൾ അണിഞ്ഞ നമ്പർ 7 ജെർസിയിൽ മിക്കി തിളങ്ങുമെന്നാണ് ആരാധക പ്രതീക്ഷ.

കൂടുതൽ കായിക വാർത്തകൾക്ക് : www.facebook.com/FanportOfficial